متقي د ايران د بهرنيو چارو د وزیر له سلاکار سره کتلي
دید خبرې آژانس: د اسلامي امارت د بهرنيو چارو وزارت سرپرست مولوي امير خان متقي په خپل کاري دفتر کې د ايران د بهرنيو چارو د وزير له سلاکار محمد رضا بهرامي او په کابل کې د هغه هېواد له سفير سره کتلي دي.
د بهرنيو چارو وزارت د يوې خبرپاڼې په خپرولو سره ويلي چې په دې کتنه کې د دواړو هېوادونو په اړيکو کې د نوي فصل، وروستيو پرمختګونو، اوبو او ايران کې مېشتو افغان کډوالو د وضعيت په تړاو هراړخيزې خبرې شوې دي.
ښاغلي متقي په دغه کتنه کې له ايران سره د افغانستان اړيکې مخ پر ودې بللې او ټينګار يې کړی، چې دواړه هېوادونه له شته فرصتونو بشپړه ګټه پورته کړي.
په ورته وخت کې د ايران د بهرنيو چارو وزارت سلاکار په دغه کتنه کې کابل ته د ايران د بهرنيو چارو د وزير له وروستي سفر وروسته دوو اړخيزو اړيکو کې نوی پړاو ياد او ټينګار يې کړی، چې دواړه هېوادونه وکولای شي دوې اړخيزې چارې په ښه ډول مديريت کړي.
