متقي: ا.ا د یوه هېواد د خوښۍ لپاره له بل هېواد سره نهجنګېږي
دید خبرې آژانس: د بهرنیو چارو وزارت سرپرست امیرخان متقي په عمان کې له افغان سوداګرو سره په کتنه کې ویلي، چې اسلامي امارت متعادل سیاست غوره کړی او د یوه هېواد د خوښۍ لپاره له بل هېواد سره مبارزه نهکوي.
ښاغلی متقي د خپلې وینا په یوه برخه کې زیاتوي، چې له عماني چارواکو سره یې د ویزې او افغان بندیانو د لېږد په هکله خبرې کړې دي.
نوموړي په عمان کې له مېشتو افغان سوداګرو سره په کتنه کې زیاته کړه چې، اسلامي امارت له نړۍوالې تولنې سره ښې اړیکې لري او غواړي چې، افغانستان د منفي سیالیو پر ځای د اقتصاد او ټرانزیټ یو لوری واوسي.
امیرخان متقي په دې هکله ویلي:«متوازین سیاست په دې معنا، چې د یوه هېواد د خوشحالۍ لپاره له بل هېواد سره نه جنګېږو، د یوه هېواد د خوشحالۍ لپاره له بل هېواد سره مخالفت نهکوو. له ټولو سره نارمل اړیکې غواړو.»
د بهرنیو چارو وزارت سرپرست له عمان سره هم اړیکې ښې وبللې او زیاته یې کړه، چې د دغه هېواد له چارواکو سره یې افغانانو ته د ویزې د ورکړې او همداراز یې د افغان بندیانو د خوشې کېدو او بېرته خپل هېواد ته د لېږدول کېدو په تړاو هم خبرې کړې دي.
ښاغلی متقي زیاتوي:«امیدواري یې ښکاره کړه، چې انشاالله په دې ټولو برخو کې به کار سره کوو او دوی به په افغانستان کې پانګونه کوي. دلته زموږ د هېوادوالو د سهولتونو په برخه کې، د راتلونکي لپاره د راشه درشه، سوداګرۍ او ټرانزیټ په برخه کې او د بندیانو په برخه کې په دې ټولو کې الحمدالله مثبتې خبرې وشوې.»
د ویلو ده، چې عمان ته د امیرخان متقي دا لومړنی سفر دی، چې د سیاسي او اقتصادي اړیکو د پراختیا په موخه شوی دی.
