دید خبرې آژانس: سپینه ماڼۍ وایي، متحده عربي امارات به راتلونکو ۱۰ کلونو کې په امریکا کې ۱.۴ ټریلیونه ډالر پانګونه وکړي.
دغه هوکړه د امریکا له ولسمشر ډانلډ ټرمپ سره د متحده عربي اماراتو د ملي امنیت د سلاکار تر کتنې وروسته شوې ده.
دغه پانګونه به د مصنوعي ځیرکتیا، برښنا، انرژۍ او تولید په برخو کې ترسره شي.
که څه هم ځینې معاملې له وړاندې اعلان شوي خو تر دې مهاله د دې پانګونې په تړاو جزییات نه دي شریک شوي.
دغه هوکړه کې یوازینۍ نوې پروژه د (Emirate Global Aluminium) شرکت له لوري امریکا کې له تېرو ۳۵ کلونو راهیسې په لومړي ځل د المونیم ویلي کولو کارخونې جوړول دي.
سپینې ماڼۍ ویلي، دغه کارخونه به د امریکا د کورني المونیم د تولید وړتیا نږدې دوه برابره کړي.
متحده عربي امارات چې د نړۍ د تېلو له سترو صادروونکو او د واشنګټن له پخوانیو امنیتي متحدینو شمېرل کېږي، هڅه کوي چې خپله اقتصادي اتکا د نفتو له عوایدو کمه او پر نوې ټکنالوژۍ او مصنوعي ځیرکتیا تمرکز زیات کړي.
ټرمپ تر دې وړاندې هم له سعودي عربستانه هم غوښتي و چې راتلونکو څلورو کلونو کې د امریکا په اقتصاد کې څه باندې یو ټریلیون ډالر پانګونه وکړي.
