دید خبرې آژانس: د مالیې وزارت له لوري د امارتي ادارو د (۱۴۰۳هـ.ل) مالي کال د وروستیو اړینو لګښتونو او د کارکوونکو د معاشونو د اجراء په موخه، د مرکزي او ولایتي تادیاتي څانګو کارکوونکي د نوي (۱۴۰۴) مالي کال د حمل میاشتې په لومړۍ نیټه (جمعې په ورځ) خپلو دندو ته حاضر شوي دي.
له ياد وزارت څخه د را رسېدلې خبرپاڼې له مخې په دې توګه امارتي ادارې کولای شي، چې د خپلو اړینو لګښتونو او د معاشونو حوالې د مالیې وزارت تادیاتي څانګو (په مرکز کې د تادیاتو ریاست او په ولایتونو کي مستوفیتونه) ته د اجراء په موخه تسلیم کړي.
سرچينې زياته کړې، چې د ګڼې ګوڼي او وخت د ضایع کېدو څخه د مخنیوي په موخه د ادارو له درنو مسوولینو څخه په ډېر درنښت غوښتنه کېږي، څو مالیې وزارت ته د سپارل شوو حوالو مالومات په اړوند ادارو کې د سیسټم له لارې څخه وڅاري.
د مالیې وزارت په خبرپاڼه کې ډاډ ورکړل شوی، چی د ټولو امارتي ادارو د اړینو لګښتونو او معاشونو سپارل شوې حوالې به له کوم ځنډ پرته په ټاکلي وخت اجراء شي.
