دید خبرې آژانس: د ۲۰۲۳ کال له پيله تر دې دمه له تورخم لارې څه باندې ۶۷زره کورنۍ په جبري توګه هېواد ته را ستنې شوې دي.
د ننګرهار د کډوالو او راستنېدونکو چارو رییس وايي، له دغې ډلې ۴۷ زره او ۲۳۱ کورنۍ دغه ولایت کې مېشتې شوې دي.
د ننګرهار د کډوالو او راستنېدونکو چارو رییس، باز محمد عبدالرحمان و ویل: «د تورخم له لارې ۶۷ زره او ۴۷۳ کورنۍ چې ۳۵۵ زره او نهه سوه کسان کیږي، راستانه شوي، له دې ډلې ۷۰ سلنې یې په ننګرهار او پاتې یې نورو ولایتونو کې استوګن شوي دي.»
د ننګرهار د کډوالو او راستنېدونکو چارو ریاست د مالوماتو لمخې، دغه ولایت کې له پاکستانه را ایستل شوي کډوال د کرنې، مالدارۍ، حرفوي زده کړو او کوچنیو کاروبارونو په برخه کې ملاتړ ته اړتیا لري او دوی هڅه کوي د مرستندویه ادارو پرمټ ورته رسېدنه وکړي.
