ډید خبري آژانس: د کډوالو او راستنیدونکو چارو وزارت وايي، چې له پاکستان څخه ۳۷۵ کډوالې کورنۍ افغانستان ته راستانه شوي دي.
د دغه وزارت د معلوماتو له مخې، دغه کسان د سنبلې له ۳۰ مې تر میزان تر ۱ مې پورې د تورخم له لارې افغانستان ته راستانه شوي دي.
دغه وزارت وايي، چې د ملګرو ملتونو دفتر له هرې راستنې شوې کورنۍ سره نغدي مرسته کړې ده.
په همدې حال کې ځینې راپورونه د پاکستان له زندانونو د لسو ماشومانو په ګډون د ۶۰ افغان کډوالو د خوشې کېدو خبر ورکوي.
ویل کیږي چې دغه کسان د پاکستان د سند ایالت په زندانونو کې بندیان وو.
خو په دې وروستیو کې په پاکستان کې د افغان کډوالو د پراخې توقیف راپورونه ورکړل شوي دي.
