له پاکستانه د افغان کډوالو د جبري را ایستنې د بهیر پیل
دید خبرې آژانس: د پاکستان رسنیو له دغه هېواده د افغان کډوالو د جبري اېستنې بهیر له پیلېدو خبر ورکوي.
پاکستاني رسنیو راپور ورکړی چې په پاکستان کې په نا قانونه توګه د مېشتو افغان کډوالو د ایستلو بهیر به نن سبا پیل شي.
دغو رسنیو په خپل راپور کې لیکلي، چې په پاکستان کې ۲.۱ میلیونه اسناد نه لرونکي افغان کډوال او ۱.۳ میلیونه ثبت شوي کډوال مېشت دي.
د اکسپرس ټربیون د راپور یوه برخه کې راغلي: «د مارچ په ۳۱ نېټه په خپله خوښه د ستنېدو نېټه پای ته رسېدلې، په پاکستان کې په ناقانونه توګه د مېشتو افغان کډوالو د بېرته ستنېدو بهیر به نن پیل شي.
په پاکستان کې دا مهال ۲.۱ میلیونه افغان کډوال مېشت دي چې ډېری یې له قانوني اسنادو پرته په دغه هېواد کې ژوند کوي.
د دغو کډوالو شاوخوا ۱.۳ میلیونه یې د کډوالۍ ثبت شوي کارتونه لري، چې تر نیمايي زیات یې په خیبر پښتونخوا کې اوسیږي.»
خو په پاکستان کې مېشت افغان کډوال د اندېښنې په څرګندولو سره وايي، دوی له کلونو راهیسې د پاکستان په بېلابېلو سیمو کې اوسېږي، وړې او لویې پانګونې یې کړي او اوس نه شي کولای په کم وخت کې له دغه هېواده ووځي.
د کډوالو د حقونو یو شمیر فعالان له یوه هیواده د کډوالو په زور ایستل د نړۍوالو اصولو خلاف بولي.
دا په داسې حال کې ده چې تېره ورځ اسوشېټېډ پرېس د دولتي اسنادو په حواله راپور ورکړ چې د افغان کډوالو د نيولو او ایستلو لړۍ د کوچني اختر د رخصتۍ له امله د اپريل تر لسمې نېټې وځنډول شوه، خو د پاکستان ډان ورځپاڼې راپور ورکړ چې د راولپنډۍ د پوليسو مشر له اسنادو پرته د افغان کډوالو د نيولو او شړلو امر کړى دى.
