دید خبرې آژانس: د ننګرهار ولایت د اطلاعاتو او کلتور ریاست مسوولین وايي چې د تېرې یوې ورځې په ترڅ کې د تورخم له لارې ۶۲ کورنۍ او ۳۱ تنه په انفرادي ډول هېواد ته راستنې شوې دي.
د یاد ریاست د اطلاعاتو امر مولوي صدیقالله قریشي ویلي چې له یاد شمېر راستانه شویو څخه ۲۹۴ تنه د ۶۲ کورنیو غړي دي او پاتې ۳۱ تنه انفرادي کسان دي، چې د ګاونډي پاکستان هېواد څخه هېواد ته راستانه شوي دي.
نوموړي وویل چې دا لړۍ په منظم ډول روانه ده او له راستانه شویو کډوالو سره د اسنادو تثبیت، د استوګنې لپاره اسانتیاوې برابرول او بشري مرستې هم ترسره کېږي.
د یادونې وړ ده چې په دې وروستیو کې د تورخم له لارې د افغان کډوالو د بېرته راستنېدو لړۍ یو ځل بیا چټکه شوې او اړوند مسوولین هڅه کوي چې له راستانه شویو هېوادوالو سره اړینې مرستې وکړي.
