فساد سره د مبارزې په برخه د حکومت د کړنو په اړه، اشرف غني او جان ساپکو خبرې

د افغانستان د اسلامي جمهوریت جمهوررئیس محمداشرف غني نن مازدیګر د افغانستان د بیارغاونې لپاره د امریکا متحده ایالتونو ځانګړي سرمفتش (سیګار) جان ساپکو سره وکتل.

د افغانستان د اسلامي جمهوریت جمهوررئیس محمداشرف غني نن مازدیګر د افغانستان د بیارغاونې لپاره د امریکا متحده ایالتونو ځانګړي سرمفتش (سیګار) جان ساپکو سره وکتل.
ده دید خبری آژانس په رپوت، په دغه کتنه کې چې په ارګ کې وشوه دواړو لوریو فساد سره د مبارزې په برخه کې د افغان حکومت د پرمختګونو، لاسته راوړنو او کاري پایلو په اړه بحث او خبرې وکړې.
په پيل کې د افغانستان حکومت د بېلابېلو بنسټونو مسوولینو د مالي مسایلو، د عوایدو د راټولو او زیاتوالي، د بودجې د تخصیص، د مالي منابعو د ضایع کېدو د مخنیوي، د ګمرکي سیستمونو د تنظیم او د افغانستان د ادارو د غیرضروري مصاروفو د کموالي په اړه معلومات ورکړل.
وروسته جمهوررئیس غني په خپلو خبرو کې وویل، د افغانستان د انکشافي بودجې د مصرف د فیصدۍ لوړوالی د حکومت لپاره یو ښه پرمختګ دی، ځکه مخکې تر ۵۰ سلنې کمه بودجه مصرفېده، ولی اوس دغه رقم ۹۷ سلنې ته لوړ شوی چې دا کار د افغانستان د ادارو د ظرفیت لوړوالی ښیي.
جمهوررئیس وویل، د ملکي خدمتونو په ځانګړي ډول د ملکي خدمتونو د کارکوونکو د استخدام د څرنګوالي په برخه کې جدي اصلاحات راغلي دي. هغه زیاته کړه، د ملکي خدمتونو د ادارو په تعیناتو کې د سیاسيونو د مداخلې مخه نیول شوې، دغه راز په تېر یونیم کال کې د اداري اصلاحاتو او ملکي خدمتونو خپلواک کمېسیون د ملکي خدمتونو په بېلابېلو ادارو کې ۵۰ زره تنه او ۲۰ زره ښوونکي د ټاکل شویو معیارونو مطابق استخدام کړي دي.
جمهوررئیس غني د افغانستان ادارو د ځوانولو په اړه وویل، په ادارو کې د ځوان نسل په ګومارلو سره ادارو ته نوې انرژي وارده شوې او په استخدام کې د سیاسي نفوذ پر کمښت سربېره، د افغانستان ادارې په مسئولو او خدمتګارو ادارو بدلې شوې دي.
جمهوررئیس غني د ملي تدارکاتو په برخه کې تر ۲۰۰ د زیاتو غونډو دایرېدو او له ۹۰۰ ملیون ډالرو زیاتې سپما ته په اشارې وویل، په امنیتي او دفاعي سکتور کې چې ډېره برخه یې د امریکا متحده ایالتونه تمویلوي، په کاري، ساختاري او تدارکاتي برخو کې د پام وړ اصلاحات راغلي دي.
جمهوررئیس د دولت په عدلي او قضایي دستګاو کې د اصلاحاتو په اړه وویل، د دولتي ادارو په چارو کې د قانونمندۍ په موخه، په تېرو پنځو کلونو کې تر ۴۰۰ زیات قوانین تصویب شوي او د دولت لسګونه مامورین په فساد کې د لاس لرلو له امله محاکمه شوي دي.
جمهوررئیس غني همداراز وویل، د کانونو قوانین تنظیم شوي، د پاسپورت او پُستي خدماتو په برخه کې د شفافیت کچه لوړه شوې او د ښاروالیو په قانون کې تغییرات راغلي دي.
د افغانستان د اسلامي جمهوریت جمهوررئیس څرګنده کړه، د ځمکو له غصب څخه د مخنیوي په موخه، ټولې دولتي ځمکې د ځمکو په بانک کې ثبت شوي او په ټوله کې افغان حکومت د فساد د مخنیوي او د دې شومې پدیدې د رېښو د ایستلو لپاره، جدي تعهد لري.
په مقابل کې، د افغانستان د بیارغاونې لپاره د امریکا متحده ایالتونو ځانګړي سرمفتش وویل، په افغانستان کې د فساد پر وړاندې د مبارزې په برخه کې ښه پرمختګونه شوي دي.
هغه زیاته کړه: خوښ یم چې د فساد پر وړاندې د مبارزې لپاره برنامې تطبیق شوي او د افغانستان حکومت د فساد پر وړاندې د مبارزې په برخه کې ښه پرمختګونه کړي دي، دغه هلې ځلې باید دوام وکړي.