عمري: نظامونو بقاء د ټینګ ایمان او عقیدې تر څنګ ټکنالوژۍ ته هم اړتیا لري
دید خبرې آژانس: د کورنیو چارو وزارت لومړي مرستیال مولوي محمد نبي عمري د پنجشنبه په ورځ په خوست کې د مندوزیو ولسوالۍ اړوند د برخانخېلو مدرسې په جلسه کې ګډون وکړ، هغه مدرسه د دوو جهادونو د سرلاري مرحوم مولوي جلال الدین حقاني رحمه الله د زده کړو ځای دی او له نن څخه ۶۵ کاله مخکې جوړه شوې ده.
هغه د خپلې وینا په پیل کې د یادې مدرسې د حفظ له برخې فارغانو، د هغوی کورنیو او استادانو ته مبارکي وویله او تر څنګ یې وویل:”دلته د مشرانو او ځوانانو راتګ ستاسو له دین او زده کړو سره مینه ښیي او دا چې دیني مدرسې د تېرو نظامونو پر مهال په سختو شرایطو کې د امریکایانو او نورو یرغلګرو له لوري له ډول ډول ننګونو سره مخ وې؛ مجاهدینو درته وساتلې، نن هماغه د مدرسو مجاهدینو تاسو ته ازادي راوړه، باید چې د مدرسو او د هغوی د طلباوو قدر او ملاتړ وکړئ”.
هغه په دې برخه کې د همدغې مدرسې بنسټ ګر پاچا خان صاحب د ژوند کیسه وکړه او ویې ویل چې د ثور له انقلاب وروسته بې له کوم جرم څخه هغه د کمونیستانو له لوري څو وارې بندي شو.
هغه زیاته کړه چې د دوو جهادونو سرلاري او د حقاني د کورنۍ مشر مرحوم مولوي جلال الدین حقاني رحمه الله هم په دې مدرسه کې زده کړې کړې دي.
هغه ټینګار وکړ چې انقلابونو د ټینګښت او د نظامونو د ساتنې لپاره د ټینګ ایمان تر څنګ د ټکنولوژۍ او عصري علم زده کولو ته هم اړتیا لري.
باید چې ځوانان د عصري او دیني زده کړو په برخه کې ځانونه د کمال تر کچې ورسوي.
هغه زیاته کړه چې د پوهنتون او ښوونځي تر څنګ موږ دیني زده کړو ته هم ضرورت لرو او په کار ده چې خپل بچیان مدرسو ته هم ولېږو، تر څو مو دنیوي او اخروي ژوند کامیاب او ښایسته شي.
هغه پر ټولنیزو رسنیو د اسلامي نظام د ګواښونکو او تخریبوونوکو په اړه وویل چې په دې کار سره دوی هېڅ نه شي ترلاسه کولی؛ بې له دې نه چې خپل دنیوي او اخروي ژوند خراب کړي.
د خپلې وینا په پای کې یې خلک له نظام سره همکارۍ ته راوبلل او ویې ویل: “دنیا کې هېڅ داسې نظام نشته چې خپل ولس ته یې مفته پیسې او امکانات ورکړي وي، له تاسو هم غوښتنه کوو چې د ځینو کوچنیو ستونزو پر وړاندې د نظام مخالفت مه کوئ، دیني او عصري زده کړې وکړئ، کار او وظیفه ترسره کړئ او په ارامه خپل ژوند وکړئ”.
