دید خبرې آژانس: د ایران د بهرنیو چارو وزیر عباس عراقچي له یوې ایراني رسنۍ سره په مرکه کې ویلي، چې اوس مهال په افغانستان کې حاکمیت او امنیت تامین شوی او شرایطو د تېر پرتله بدلون موندلی دی.
ښاغلی عراقچي ټینګار کوي، میداني حقیقت دا دی چې د تېرو درې نیمو کلونو راهیسې، په افغانستان کې یوه سیاسي واکمني رامنځته شوې او خپل حاکمیت یې ثابت کړی دی.
د ایران د بهرنیو چارو وزیر په دې هکله زیاتوي:«واقعیت دا دی، چې اوس په افغانستان کې یو قدرت واکمن دی، چې په تېرو درې نیمو کلونو کې یې خپل حاکمیت تثبیت کړی دی او د تېر په خلاف، چې د افغانستان هره څنډه د یوې ډلې په واک کې وه، اوس داسې نه ده. امنیت ټینګ دی او موږ باید د خپلو ملي ګټو لپاره دې موضوعګانو ته پاملرنه وکړو او حل یې کړو.»
دغه ایرانی چارواکی، د نشهيي توکو موضوع، په ایران کې د افغان کډوالو حضور، د ګډو پولو امنیت او د حقابې مسئله د ایران او اسلامي امارت ترمنځ د بحث وړ مهمې موضوعګانې بولي.
عباس عراقچي وايي:«بحث د نشهيي توکو دی، بحث د افغان کډوالو دی، چې ټول په هېواد کې دې موضوع ته حساس شوي دي او وايي چې باید په دې برخه کې فکر وشي، زموږ د سرحدونو امنیت دی چې موږ شاوخوا زر کیلومتره ګډ سرحد لرو او د هغې امنیت، متر په متر موږ ته مهم دی.»
د افغانستان سرپرست حکومت هم د افغانستان د وضعیت د ښهوالي په اړه، د ایران د بهرنیو چارو وزیر څرګندونې ستایي.
د اسلامي امارت د ویاند مرستیال حمدالله فطرت وايي، چې د ښاغلي عراقچي دغه څرګندونې د افغانستان د اوسني واقعیت ژور درک دی.
د اسلامي امارت د ویاند مرستیال په دې هکله زیاتوي:«دا په اصل کې د افغانستان د شته واقعیتونو د سم درک په معنا دی او دا یو واقعیت دی، چې په افغانستان کې یوه واحد سیاسي واکمني موجوده ده، چې د افغانستان په ټوله جغرافیه باندې بشپړ حاکمیت لري.»
سره له دې، چې سرپرست حکومت په تېرو درې کلونو کې له ایران سره ښې اقتصادي او سیاسي اړیکې لرلې دي؛ خو د افغان کډوالو د ایستلو موضوع، د حقابې مسئلې، د سرحدونو امنیت او د نشهيي توکو قاچاق ته د ایران اندېښنې هغه مسایل دي، چې د کابل او تهران په اړیکو یې اغېز کړی دی.
