دید خبرې آژانس: د اوبو او انرژۍ وزارت سرپرست ملا عبداللطیف منصور او د زابل ولایت د اوبو او انرژۍ رئیس ملا عبدالکریم ذوالفقار، په دغه ولایت کې له عمري بند څخه لیدنه کړې ده.
په خبرپاڼه کې راغلي چې د اوبو او انرژۍ وزارت سرپرست له عمري بند څخه د لیدنې پرمهال؛ د دغه بند د ساتنې او پاملرنې په اړه اړوندو مسوولینو ته اړینې سپارښتنې کړې دي.
د عمري بند پروژه د زابل د مرکز قلات ښار په څلور کيلومتري کې موقعیت لري چې د څه باندې ۱۲۷ میلیونه افغانیو په ارزښت د موسمي سېلابونو د کنټرول، د کرنیزو ځمکو د خړوبولو او تر ځمکې لاندې اوبو سرچینو د تقویې لپاره پلې شوې ده.
یاد بند د ۲۳ مترو په لوړوالي سره د ۲.۹ میلیونه متره مکعب اوبو د ذخیره کولو، د ۶۱ کېلوواټه برېښنا د تولید او د شاوخوا ۵۶۰ هکتاره کرنیزو ځمکو د خړوبولو وړتیا لري.
