عبدالرحمن لوګري د امریکا له خوا له هند څخه افغانستان ته انتقال شو

دید خبری آژانس: واشنګټن ټایمز خبر ورکړی چې د کابل په هوایی ډګر د خونړۍ حملې عامل عبدالرحمن لوګری د ویستلو په بهیر کښې د امریکې له خوا له هندوستان څخه افغانستان ته لیږدول شوی دی.

دا خبره د امریکا د پوځ د مرکزي قوماندانۍ (CENTCOM) له خوا د کابل د هوايي ډګر په «ایبی ګېټ» کې د ژغورنې د پروسې پر مهال د شوي برید په اړه د نوې څېړنې تر خپرېدو څو ورځې وروسته دغې امریکايي رسنۍ کړې ده.

دغې امریکايي رسنی د چهارشنبې په شپه (د ثور ۵) د امریکا د استازو جرګې د بهرنیو اړیکو د کمیټې د ځینو جمهوري غوښتونکو غړو په حواله راپور ورکړی چې لوګري په ۲۰۱۷ میلادي کال کې په هند کې د حملې په هڅه کې نیول شوی او بیا د امریکا له خوا افغانستان ته منتقل شوی دی.

په راپور کې راغلي: «هغه [لوگري] له یوه زندان څخه بل زندان ته لېږدول شوی و، تر دې چې د ۲۰۲۱ کال په جنورۍ کې د بګرام زندان ته، چې د امریکايي ځواکونو یوه مهمه هوايي اډه وه، لېږدول شوی و».

یوې سرچینې چې نوم یې په راپور کې نه دی یاد شوی ویلي چې امریکايي ځواکونه د ۲۰۲۱ کال د جولای په دویمه شپه له افغان ځواکونو سره له همغږۍ پرته د بګرام له اډې وتلي وو.

د دغې سرچینې په وینا، لوګري او د داعش یو شمېر نور بندیان د طا-لبانو تر نیولو پورې د بګرام پوځي اډه په زندان کې وو.

وروسته له هغه چې طا-لبانو واک تر لاسه کړ، دوی د ۲۰۲۱ کال د اګست په ۱۵ د کابل هوايي ډګر پر ایبی دروازې د برید عامل له برید ۱۱ ورځې وړاندې خوشې کړ.

د دغه راپور پر بنسټ، جګپوړي امریکايي قومندانان له طا-لبانو تمه لري چې د لوګر د خلکو خوشې کول به د داعش هر ډول نفوذي کسان په نښه کړي.

په دې راپور کې دا هم ویل شوي چې د امریکا د استازو جرګې د بهرنیو اړیکو د کمېټې ډېری جمهوري غوښتونکي په دې باور دي چې د دغه هېواد پوځ کولای شي د کابل هوايي ډګر ایبی دروازې ته څېرمه د ځانمرګي برید کوونکي مخه ونیسي.

د دغې کمیټې یوه غړي ټینګار وکړ: دا کمیټه دا نه مني چې د ایبی دروازې د حملې مخنیوی یې ناشونی و.

دا په داسې حال کې ده چې څو ورځې وړاندې د ۲۰۲۱ کال د اګست په میاشت کې د کابل د هوايي ډګر پر ایبی دروازې د داعش ډلې د برید په اړه په خپله نوې څېړنه کې سینټ کام دغه برید بې مخینې بللی و.

د دغه برید په پایله کې ۱۳ امریکايي پوځیان او تر ۱۷۰ ډېر افغان ملکي وګړي ووژل شول.