طا-لبان: بندیان شکنجه نه، بلکې اصلاح کوو
دید خبرې آژانس: د طا-لبانو په بندخونو کې د چارو د سمون ادارې نظامي مرستیال وایي، چې یاده ډله په بندخونو کې د بندیانو د شکنجې نه، بلکې د دوی د اصلاح په اړه فکر کوي.
دغې ادارې د چهارشنبې په ورځ (د چنګاښ ۲۷مه) د یوې خبرپاڼې په خپرولو سره ویلي، چې بندیان باید په اسلامي فکر او روحیې وروزل شي.
د طا-لبانو په بندخونو کې د چارو د سمون ادارې نظامي مرستیال حبیب الله بدر په داسې حال کې دا څرګندونې کوي، چې د یادې ډلې له بندخونو د لسګونو فعالینو، خبریالانو او د تېر نظام د سرتېرو د شکنجو او ځورولو راپورونه خپریږي.
بدر نن یوې ناستې ته په خبرو کې ویلي، چې د هېواد په بندخونو باید بندیانو ته د ښوونې او روزنې برخې ته پاملرنه وشي او د هغو بندیانو چې عمرونه یې ډېر دي، تر نورو هغو ورسره ډېر ښه چلند وکړي.
نوموړي دغه راز له بندیانو سره د ښه چلند ترڅنګ د هغوی شرعي او انساني حقوقونو ته هم پر جدي پاملرنې ټینګار وکړ.
افغانستان انټرنشنل رسنې د غوايي په ۱۳مه د څرخيپله بندخونې د وضعیت په اړه په یوه ځانګړي راپور کې لیکلي و، چې طا-لبانو لسګونه سیاسي بندیان په ځانګړې ډول د پنجشېر او شمالي اوسېدونکي وهلي او ځورولي دي.
سرچینو دا هم ویلي وو، چې لا هم طا-لبانو د بندیانو له ځورولو لاس نه دی اخیستی.
له دې سره، د بنديانو کورنیو هم په ځلونو ویلي، چې له دوى سره د طا-لبانو چلند ډېر بد او له تاوتريخوالي ډک دى.
طا-لبانو د عمومي عفوې یا بښنې له اعلان سره – سره په لسګونو پخواني سرتېري، د ښځو د حقونو فعالانې او یو شمېر خبریالان بندیان کړي او په بېلابېلو لارو یې په زندانونو کې شکنجه کړي دي.
د طا-لبانو تر ځورولو لاندې د بندیانو د وژلو په اړه هم ځینې راپورونه خپاره شوي دي؛ خو طا-لبان یې ردوي.
د ښځو د حقونو یو شمېر فعالانو هم چې د طا-لبانو له بندخونو ازادې شوې دي، په دې وروستیو کې د یادې ډلې له بندخونو هغه رازونه افشا کړل، چې دوی ورسره مخامخ شوې وې.
د یادولو ده، پر ښځینه بندیانو جنسي تیری، بدني سزاګانې او دې ورته پیښې له پراخو بشري غبرګونو سره مخ شوی دی.
