ډید خبري اژانس: د پاکستان د کورنیو چارو وزیر د افغانستان سرپرست حکومت ته خبرداری ورکړی چې پر چینايي برید کې د لاس لرلو عاملان دې وسپاري، که نه نو پاکستان به یو اړخیز اقدام وکړي.
د ډان ورځپاڼې د راپور له مخې، د پاکستان د کورنیو چارو وزیر محسن نقوي په لاهور کې په یوه خبري غونډه کې وویل، هغه ترهګریز برید چې په کې پنځه چینايي انجینران او د هغوی پاکستاني ډرېور ووژل شول، په افغانستان کې پلان شوې وه او په پاکستان کې د مېشتو چلوونکو او اسانتیاوو په مرسته ترسره شوې وه.
هغه وويل چې په افغانستان کې د تحريک طا-لبان پاکستان (ټي ټي پي) مشري او په بشام کې د مارچ په ٢٦مه په چينايي انجنيرانو د ځانمرګي بريد تر شا د بهرنۍ استخباراتي ادارې لاس و.
هغه زیاته کړه چې دا برید «په بشپړه توګه» د افغانستان لخوا ترسره شوی او پلان شوی و چې په ځانګړې توګه په پاکستان کې چینايي انجینران په نښه کړي.
د دغه هیواد د کورنیو چارو وزیر د نورو جزئیاتو له ورکولو پرته وویل: د تحریک طا-لبان پاکستان مشرتابه دغه حمله د یوې سترې پروژې په توګه طرحه کړې وه او د دښمن استخباراتي ادارو د دغه برید لپاره هغوی ته ډیرې پیسې ورکړې وې.
دغه پاکستاني امنیتي چارواکي د افغانستان له موقت حکومت څخه غوښتي چې د تحریک طا-لبان پاکستان د مشر نورعلي محسود، د ملاکنډ قومندان عظمت الله او د بختیار شاه، قاري عبدالله او خان لالا په نومونو درې تنه مشکوک ترهګر ونیسي.
هغه وویل: موږ له افغانستان سره ښې اړیکې غواړو، خو د دې لپاره اړینه ده چې دغه ترهګر ونیول شي، محاکمه شي او یا هم موږ ته وسپارل شي.
تمه کیږي چې دا څرګندونې د دواړو ګاونډیو ترمنځ دوه اړخیزې اړیکې نورې هم ترینګلې کړي، ځکه چې اسلام اباد په وار وار پر کابل فشار راوړی چې په افغانستان کې د میشتو ترهګرو پر ضد اقدام وکړي.
نقوي زیاته کړه: پاکستان په دې اړه د افغانستان له موقت حکومت سره خبرې کړي او ټینګار یې کړی چې د هغو ترهګرو پر ضد اقدام وکړي چې هلته فعال دي، خو تر اوسه یې کومه نتیجه نه ده ترلاسه کړې.
د هغه په وينا، ترهګر د افغانستان د موقت حکومت له کمزورۍ ګټه پورته کوي.
د دې پوښتنې په ځواب کې چې که افغان حکومت همکاري ونه کړي نو پاکستان به څه وکړي، نقوي وویل چې «حکومت به یو اړخیزه پریکړه وکړي».
د پاکستان د کورنیو چارو وزیر دا څرګندونې دوه اونۍ وروسته له هغه کوي چې د پاکستان د پوځ د عامه اړیکو مشر جنرال احمد شریف وویل چې برید په افغانستان کې پلان شوی و او دا چې ځانمرګی هم یو افغان وګړی و.
د دغه هېواد امنیتي ځواکونو تر اوسه د بریدګر او د هغوی د پاکستاني تسهیلوونکو په ګډون ۱۱ شکمن کسان نیولي دي.
د دوی نومونه عادل شهباز، شفیق قریشي، زاهد قریشي، نذیر حسین، فیض الله، فصیح الله، عمران سواتي، سخا الله، عبدالله، عبدالرحمن او کمال خان دي.
