طالبانو یوولس تنه بندیان خوشي کړل
طالبان وايي، هغه یوولس دولتي عسکر يې خوشې کړي چې څه موده مخکې يې په کندهار ولايت کې د جګړې پر مهال نيولي و.
د طالبانو له لوري رسنيو ته په لېږلې خبرپاڼه کې راغلي چې یاد عسکر يې د خپل مشر په امر ازاد کړي او زياتوي چې دغه يوولس تنه عسکر يې د ارغندان ولسوالۍ د سوزنيانو او د شاه وليکوټ ولسوالۍ د زنګيتان د قرارګاوو څخه نيولي و چې ټول خوشې شول.
په خبرپاڼه کې د ازاد شويو عسکرو نومونه هم راغلي او طالبان وايي د خوشې کولو پر مهال يې هر تن ته پنځه – پنځه زره افغانۍ د لارې خرڅ هم ورکړی دی.
دا په داسې حال کې ده، چې تېره ورځ راپورونه ورکول شول چې افغان ولسمشر اشرف غني د کابل زنبق څلور لارې د پېښې په تړاو د يوولسو طالب بنديانو د اعدام حکم توشيح کړی دی.
په ياده پېښه کې سل کسان ووژل شول او شاوخوا څلور سوه نور يې ټپيان شول.
د پېښې پړه داعش ډلې په غاړه واخيسته، خو د افغانستان ملي امنيت ادارې ادعا وکړه چې په دې پېښه کې طالبان او بالخصوص حقاني ډله شامله ده.
وسله والو طالبانو د کابل پېښه وغندله او په دغه بريد کې يې لاس لرل رد کړل.
طالبانو د دوی د يوولسو بندي ملګرو د دولت د اعدام د پريکړې په اړه سخت غبرګون څرګند کړ او د يوې اعلاميې په خپرولو سره يې وويل: که د دوی بنديان اعدام شي نو ټول دولتي ارګانونه، اړوندې ادارې، عدلي او قضايي محکمې او منسوبين به يې تر بريدونو لاندې ونيسي.
طالبانو ګواښ وکړ، که د دوی بنديان اعدام شي نو له دوی سره په بند کې د خارجي بنديانو ژوند به له هم ګواښ سره مخ شي.
اوس مهال د طالبانو په زندانونو کې ګڼ شمير بهرني بنديان شته، چې دوی غواړي په ځينو يې د خپلو بنديانو تبادله وکړي.
الماس خدرخېل
