دید خبرې آژانس: د د اسلامي امارت د عدليې وزیر، محترم شیخ الحدیث مولوي عبدالحکیم شرعي د سن پترزبورګ د نړیوالې حقوقي مجمعې په دیارلسمه ناسته کې چې د روسیې هېواد په کوربتوب جوړه شوه، ګډون او وینا وکړه او په نړیوالو قوانینو کې د اصلاحاتو له لارې یې د نړیوال عدالت پر تأمین ټینګار وکړ.
دا ناسته د روانې اوونۍ د دوشنبه په ورځ د روسیې په سن پترزبورګ ښار کې پیل شوه او د روسیې د عدلیې وزیر او د نړۍ د څهباندې ۸۰ هېوادونو د عدلیې وزیرانو او قضايي مقاماتو پهکې ګډون درلود.
د اسلامي امارت د عدلیې وزیر په دې ناسته کې پرون سهشنبې، د ذیالقعدې میاشتې په ۲۲مه نېټه په خپلې وینا کې ټینګار وکړ چې د جرم کموالۍ هم په ملي کچه او هم په نړیوالې کچې همغږۍ او پوهاوي ته اړتیا لري او که چېري د مجازاتو ترڅنګ همغږي او پوهاوي هم واوسي، جرمونه به کم شي.
دغه راز هغه د قوانینو په تړاو وویل چې د اسلامي امارت ټول قوانین د شریعت پر اساس تدوین کېږي او قضایي پرېکړې د شریعت په اساس ترسره کېږي.
د اسلامي امارت د عدلیې وزیر روښانه کړه چې اسلامي امارت زندانونه د اصلاح، تربیې، شخصیت جوړونې او دیني پوهاوي په مرکزونو تبدیل کړي دي.
د اسلامي امارت د عدليې وزیر په خپلو خبرو کې دا هم وویل چې اسلامي امارت، اسلامي شریعت ډېر سپېڅلی او ارزښتناک ګڼي او درناوی یې پر ټولو لازم بولي؛ ځکه اسلام په واقعي توګه انساني کرامت او نړیوال عدالت تضمینوي. هغه زیاته کړه چې اسلامي امارت له هر هغه هېواد او سازمان سره چې اسلامي ارزښتونو، د افغانستان ملي حاکمیت او ځمکنۍ بشپړتیا او د اسلامي امارت خپلواکۍ ته درناوی لري، تعامل او د حقوقي همکاریو لپاره چمتو دی.
په یاد ناسته کې د نورو هېوادونو د عدلیې وزیرانو، قضايي مقاماتو او حقوقي کارپوهانو هم وینا وکړه.