ډید خبري اژانس: د سپینې ماڼۍ د امنیت شورا ویاند وايي، طا-لبان د هرې ورځې په تېرېدو سره د نړیوال مشروعیت له ترلاسه کولو څخه لېرې کېږي.
د سپینې ماڼۍ د امنیت شورا ویاند جان کربي پرون په یوه خبري غونډه کې وویل چې د طا-لبانو په اړه د واشنګټن پالیسي نه ده بدله شوې.
هغه همدا راز ټینګار کړی چې طا-لبان د نړۍ د ارادې خلاف حرکت کوي او د هرې ورځې په تېرېدو سره د نړیوال مشروعیت له ترلاسه کولو څخه لېرې کېږي.
جان کربي د خبریالانو د پوښتنو په ځواب کې ویلي چې طا-لبان په افغانستان کې د حکومتدارۍ او له ښځو او نجونو سره د چلند په اړه د خپلو ژمنو خلاف عمل کوي.
هغه څرګنده کړه: دوی نه یوازې دا چې د دغو ژمنو په پوره کولو کې پاتې راغلی، بلکې برعکس لاره یې خپله کړې ده.
کربي یو ځل بیا ټینګار کړی، چې په دې حالت کې امریکا د طا-لبانو د پېژندلو نیت نه لري.
جان کربي د القاعدې په اړه ویلي دي چې دا شبکه «یقینًا ډیره کمزورې شوې ده او داسې نه ښکاري چې افغانستان ته به بیرته راشي».
د هغه په وينا، امريکا په افغانستان کې د ټولو ترهګرو ډلو څارنه کوي.
