سوداګریز نندارتونونه تر بل خبرتیا پورې وځنډول شوې
د دید خبري آژانس د خبر له مخې، د سوداګرۍ او صنایعو وزارت د نوې مقررې تر جوړېدو پورې د صنعتي او سوداګریزو نندارتونونو د ترسره کېدو د ځنډولو اعلان کړی دی.
د دغه وزارت ویاند عبدالسلام جواد نن (د میزان ۱۱مه) په یوه ویډیويي کلیپ کې وویل چې د نندارتونونو د ښه ترسره کېدو او د اسانتیاوو د برابرولو په خاطر د کورنیو او بهرنیو نندارتونونو د ترسره کولو په طرزالعمل کې یو لړ بدلونونو ته اړتیا ده.
هغه زیاته کړه، تر څو چې د نوې کړنلارې تر تنظیم لاندې نه وي، د نندارتونونو جوړول وځنډول شي.
په ورته وخت کې د صنایعو او سوداګرۍ وزارت ویاند په کابل کې د سوداګرو ښځو په شتون سره د یو نندارتون د جوړېدو خبر ورکړی دی.
هغه زیاته کړه چې په نندارتونونو کې د ښځو پر ګډون هیڅ ډول بندیز نشته.
د صنایعو او سوداګرۍ وزارت ویاند زیاته کړه، له سوداګرو ښځو سره هر اړخیزه مرسته کوي او د هغوی د سوداګرۍ د ودې لپاره یې اسانتیاوې برابرې کړي، څو د هېواد په اقتصاد کې د پام وړ ونډه واخلي.
په داسې حال کې چې د ښځو پر کار پراخ محدودیتونه شته.
د ښځو پر کار وروستی محدودیت د ښځو د ویښتانو پر سالونونو بندیز دی، چې زرګونه ښځې یې بې کاره کړې دي.
همدارنګه ښځې په دولتي او نادولتي دفترونو کې له کار کولو منع دي.
