د ملا هبت الله د اختر پیغام:
زموږ ژمنتیا ټینګه ده، موږ له دوی څخه هم تمه لرو چې زموږ ګټو ته پام وکړي
دید خبري آژانس: په کندهار او یو شمېر نورو ولایتونو کې د بې پیلوټه الوتکو له ګزمې وروسته، ملا هبت الله اخندزاده د اختر په پیغام کې ټینګار کړی، چې د طا-لبانو ژمنې ټینګې دي او نور باید د افغانستان هویت، ګټو او عزت ته پام وکړي.
ملا هبت الله د شنبې په ورځ د کوچني اختر په مناسبت په یوه پیغام کې د افغانستان خاورې ته د هېوادونو پر درناوي ټینګار کړی دی.
هغه وویل چې طا-لبان «د خپل شرعي تګلارې او متقابل احترام په چوکاټ کې له هر چا سره ښې اړیکې لري او دوی په دې نیت او نیک نیت غواړي چې په دې کې شک ونه شي».
اخندزاده زیاته کړه: «زموږ ژمنه او تعهد پاتې دی او موږ له هغوی څخه هیله لرو چې د افغانستان هویت، ګټو او عزت ته پام وکړي او موږ غواړو چې دوی له موږ سره ښې اړیکې جوړې کړي».
اخندزاده ټینګار کړی، چې دوی د سیمې له ټولو هېوادونو سره د «متوازن او اقتصاد پالېسۍ» په چوکاټ کې پر مخ ځي او له ټولو سره ښې دیپلوماتیکې او اقتصادي اړیکې غواړي.
نوموړي دغه راز له بېلابېلو هېوادونو غوښتي، چې له طا-لبانو سره ښې اړيکې ټينګې کړي، د باور فضا رامنځته کړي او د همکارۍ پر روحيې ولاړه تګلاره غوره کړي.
هغه د بهرنیو چارو وزارت ته لارښوونه وکړه چې له ټولو هېوادونو او په ځانګړې توګه له اسلامي نړۍ سره د باور فضا رامنځته کړي.
په تېرو څو ورځو کې د کندهار په ګډون په یو شمېر ولایتونو کې د بې پیلوټه الوتکو د ګزمې راپورونه خپاره شوي دي.
