روغتیا نړۍوال سازمان: په ۲۰۲۴ کې افغانستان کې نريرنځ ۳٫۳ سلنه زیاتوالی درلود
دید خبرې آژانس: د مارچ ۲۴مه له نريرنځ سره د مبارزې له نړۍوالې ورځې سره برابره ده. د روغتیا نړۍوال سازمان، په افغانستان کې د ۲۰۲۳ کال پرتله په ۲۰۲۴ کال کې د نريرنځ له ۳٫۳ سلنې زیاتوالي خبر ورکړی دی.
په افغانستان کې د روغتیا نړۍوال سازمان رییس اډوین سنیزا سالواډور په افغانستان کې د روغتیا له برخې په ځانګړې توګه له نريرنځ سره د مبارزې په برخه کې د همکارۍ ډاډ ورکړی دی.
په افغانستان کې د روغتیا نړۍوال سازمان رییس ویلي:«د وړاندې شوو معلوماتو له مخې، په ۲۰۲۴ کال کې په افغانستان کې د نريرنځ ۵۱ زره او ۳۰۰ پېښې ثبت شوې، په داسې حال کې چې دا شمېر په ۲۰۲۳ کال کې ۴۹ زره و، چې ۳٫۳ سلنه زیاتوالی ښيي. دا وضعیت څرګندوي چې افغانستان لا هم له دغې ناروغۍ او د هغې له امله له مړینو سره مخ دی.»
په افغانستان کې د ملګرو ملتونو د پراختیايي پروګرام رییس سټیفن روډریګز هم څرګنده کړې:«د ۲۰۲۴ کال له فبرورۍ میاشتې راهیسې، د څه باندې ۳۳۵ زره راستنو شویو کسانو د نريرنځ معاینات ترسره شوي دي . دغه اقدامات توانېدلي، چې د دغو ناروغانو د درملنې د دوام ملاتړ هم وکړي.»
بلخوا د عامې روغتیا وزارت (دوشنبې) د نريرنځ یا توبرکلوز د نړۍوالې ورځې په مناسبت مراسمو کې ویلي، چې په تېر زیږدیز کال کې د دغې ناروغۍ څه باندې ۵۱ زره پېښې ثبت شوې دي.
د عامې روغتیا وزارت د روغتیایي خدمتونو معین عبدالولي حقاني په دې هکله وايي:«۵۱ زره او ۳۱۹ پېښې کشف او درملنه یې کړې، د نري رنځ ناروغۍ په پام کې نیولو سره اړینه ده، چې یادې ناروغۍ د کشف او درملنې په ټولو برخو کې لا زیاتې هڅې او هر اړخیزې همکارۍ وشي.»
د نري رنځ د ملي پروګرام مسوول علي محمد امین هم طلوعنیوز ته وویل:«نړۍوال تمویلونکو د بودیجې د کمښت له امله «اېنټيپي» نه شي کولای خپلې چوپړتیاوې د سټراټېژیک پلان په مطابق پراخه کړي. د نري رنځ د کنټرول په برخه کې د سکټوري وزارتونو د همکارو ادارو ضعیفه همکاري موجوده ده.»
د روغتیا د نړۍوال سازمان د معلوماتو له مخې، په ۲۰۲۳ زېږدیز کال کې په ټوله نړۍ کې ۱۰٫۸ مېلیونه کسان پر نريرنځ اخته شوي، چې له دې منځه ۶ مېلیونه نارینه، ۳٫۶ مېلیونه ښځې او ۱٫۳ مېلیونه ماشومان دي.
سږ کال، دا ورځ د «هو! موږ کولای شو په ژمنتیا، پانګونې او د پروګرامونو په پلي کولو سره د نريرنځ ناروغي پای ته ورسوو» تر شعار لاندې ونمانځل شوه.
