روسیه په افغانستان او منځني ختیځ کې د داعش په روزلو کې د لویدیځ پر رول انتقاد کوي
ډید خبري اژانس: د روسیې استازي د ملګرو ملتونو د امنیت شورا په غونډه کې په منځني ختیځ، افریقا او افغانستان کې د داعش ترهګرې ډلې په وده کې د لویدیځ پر رول نیوکه وکړه.
د ملګرو ملتونو امنیت شورا پرون په یوه غونډه کې د افغانستان په ګډون په نړۍ کې د داعش ډلې فعالیتونه وڅیړل.
ملګرو ملتونو په یوه راپور کې ویلي، چې اوسمهال په افغانستان کې د داعش جنګیالیو او د کورنیو غړو شمېر له ۴ زرو تر ۶ زرو پورې اټکل شوی دی.
د ملګرو ملتونو د امنیت شورا د راپور په یوه برخه کې راغلي: د داعش خراسان څانګې په افغانستان کې دننه خپل عملیاتي وړتیاوې زیاتې کړي دي. په دې توګه په افغانستان کې د دغې ډلې د جنګیالیو او د کورنیو د غړو ټولټال شمېر له ۴۰۰۰ څخه تر ۶۰۰۰ پورې اټکل شوی چې د پخوانیو راپورونو په پرتله زیاتوالی ښيي. غړي هیوادونه له افغانستان څخه بهر د داعش د خراسان څانګې د ظرفیتونو په اړه د مخ په زیاتیدونکو اندیښنو خبر ورکوي.
خو طا-لبانو په ځلونو د نورو هېوادونو پر وړاندې د افغانستان د خاورې د امنیت خبره کړې او په افغانستان کې یې د داعش ډلې له ظرفیتونو هم انکار کړی دی.
په همدې حال کې د روسیې استازې ماریا زبلوتسکایا د امنیت شورا په غونډه کښې وویل: په مینځنی ختیځ کښې د داعش رامینځته کیدل د عراق په خلاف د امریکې او د هغه د ائتلاف د تیریو مستقیمه نتیجه وه.
د هغه په وينا، پر ليبيا د ناټو له بريد سره په افريقا کې هم داعش راڅرګند شو.
د روسیې استازي زیاته کړه: د افغانستان وضعیت هم د لویدیځ یوه څرګنده بیلګه ده چې له تروریزم سره د مبارزې له مسئلې څخه د خپلو شخصي جیو پولیټیکو ګټو لپاره کار اخلي.
هغه زیاته کړه، امریکا له ترهګرو سره د مبارزې په پلمه ۲۰ کاله په افغانستان کې وه، خو القاعده ته له ماتې ورکولو پرته له دغه هېواده ووتله او هغه زیاته اندازه وسلې او پوځي تجهیزات یې له نورو ځایونو غلا کړل. او د ترهګرو لاس ته ورغلل.
