دید خبرې آژانس: د افغانستان په چارو کې د روسیې ځانګړي استازي ضمیر کابلوف ویلي، روسیه به د افغانستان په اړه د ملګرو ملتونو په غونډه کې چې د جون له ۳۰مې څخه د جولای تر لومړۍ نېټې په دوحه کې جوړېږي، ګډون وکړي.
کابلوف څرګنده کړه:«د جون له ۳۰مې څخه د جولای تر لومړۍ نېټې پورې په دوحه کې دوه ورځنۍ غونډه جوړېږي. دا غونډه د ملګرو ملتونو د سرمنشي په نوښت او د افغانستان په اړه د ځانګړو استازو په ګډون جوړېږي.»
له دې وړاندې د جون په اتمه نېټه په تهران کې د مسکو د تماس ډلې يوه غونډه جوړه کړې وه.
د تهران په غونډه کې د روسیې سربیره ایران، چین او پاکستان هم ګډون درلود.
د کابلوف په وینا، د تهران غونډه د دوحې غونډې ته د مشورې او چمتووالي لپاره جوړه شوې وه.
