دید خبرې آژانس: د امریکا بهرنیو چارو وزیر مارکو روبیو یو ځل بیا د نړۍ ځينو هېوادونو ته د امریکا د اړینو او بېړنیو مرستو له دوامه ډاډ ورکړی دی.
مارکو روبیو د امریکا د نړۍوالې پراختیايي ادارې پر کړنو له نیوکو سربېره په رڼه او سمه توګه د بهرنیو مرستو د دوام ژمنه کړې ده.
روبیو ویلي: «موږ د خپلو بهرنيو مرستو پروګرامونه داسې تنظیموو چې د امریکا او زموږ د وګړو له ګټو سره سم وي. موږ خپلو اړینو بشري مرستو ته دوام ورکوو او سټراتیژیکې پانګونې کوو چې زموږ شریکان او خپل هېواد پیاوړی کړي.»
د امریکا پر بهرنیو مرستو بندیز لپاره ټاکل شوې وروستۍ نېټې ته څه باندې ۲۰ ورځې پاتي، خو تر اوسه د دغو مرستو د بیا پیلولو کومه ځانګړې تګلاره په پام کې نه ده نیول شوې.
دغه مرستې د امریکا د ولسمشر ډانلډ ټرمپ له لوري د ۹۰ ورځو لپاره ځنډول شوې وې.
د امریکا پر بهرنیو مرستو بندیز افغانستان کې د ځینو بنسټونو پر فعالیتونو هم اغېز کړی او اقتصادي شنونکي د ټرمپ د حکومت اقتصادي تګلاره غیره مسلکي بولي.
اقتصاد وزارت هم له افغانستان سره د بشري مرستو دوام د افغانانو د اقتصادي ثبات او پیاوړتیا لپاره اغېزناک ګڼي او د دغو مرستو پر دوام ټینګار کوي.
د اقتصاد وزارت ویاند، عبدالرحمن حبیب و ویل: «له بشري مرستو، پراختیایي مرستو ته لېږد د ناورین ځپلو ټولنو د پایښت او ځان بسیاینې لپاره یوه حیاتي پروسه ده او موږ له ټولو بنسټونو او هېوادونو غواړو چې د اقتصادي ثبات او د خلکو پیاوړتیا لپاره خپلو مرستو ته دوام ورکړي.»
تر دې وړاندې د ناروې د کډوالو شورا، د ماشومانو د ژغورنې صندوق او ځینو نورو مرستندویو بنسټونو ویلي و چې د بودیجې د کمښت له امله اړ شوي، څو افغانستان کې د خپلو مرستو یوه برخه ودروي.
