دید خبرې آژانس: ټولګټو وزارت وايي، روان هجري لمریز کال په هېواد کې د څه باندې ۱۲۰۰ کیلومټره سړکونو د سروې او ډيزاین چارې پیل شوې دي.
د ټولګټو وزارت ویاند محمد اشرف حق شناس په خبره، له دغو رغنیزو پروژو د واخان دهلېز او د غوربند – دوشي سړک په ګډون د ځینو د جوړېدو چارې بشپړې شوې دي.
ښاغلی حقشناس همداراز زیاته کړې چې، دمګړۍ هم د سړک جوړونې او نورو بنسټیزو چارو کارونه دوام لري او په ځینو برخو کې د پام وړ پرمختګونه هم شوي دي.
د ټولګټو وزارت ویاند په دې هکله وايي:«هغه ډلې چې په مرکز کې کار کوي کابو ۱۲۰۷ کیلومټره سړک موږ تر سروې، ډيزاین لاندې نیولي دي، چې د ډېریو دغو سړکونو د سروې کارونه خلاص شوي او اوس د ډيزاین په پړاو کې دي.»
د ټولګټو وزارت تخنیکي مرستیال هم په دغه پروګرام کې وايي، چې د قیصار- لامان حلقوي سړک پروژه د یوې مهمې پروژې په توګه شمېرل کېږي چې لومړی برخه به یې د پروان ولایت د کرومایټو کان په بدل کې پیل شي.
د کندهار- ارزګان لویه لار، د کابل – کندهار لویه لار، د سالنګونو لویه لار، د کابل – غزني سړک دویم لین، د کابل – جلالاباد لویې لارې دویم لین، د هرات – چشت شریف سړک، د دشت ارچي – کندوز سړک، د کندهار – سپین بولدک سړک دویم لین، د ۲۶۴ مېلیونه افغانیو په ارزښت د هرات – کندهار د وسپنې پټلۍ د پنځو تړونونو لاسلیک کېدل، د ۷۱۳ مېلیونه افغانیو په ارزښت د میدان وردګ – لوګر د نښلونکي سړک رغونه، هغه پروژې دي چې تر کار لاندې دي.
د ټولګټو وزارت تخنیکي مرستیال عبدالکریم فاتح په دې هکله وايي:«د دوو لاټو سروې او ډیزاین یې سږکال ترتیب شوي او په یوه لاټ کې یې ۲۵ کیلومټره سړک د رغونې چارې د څه باندې ۱٫۴ مېلیارد افغانیو په ارزښت د پروان ولایت د کرومایټو کان په بدل کې د نورزي کانفډینس د سړک جوړونې او ودانیز شرکت سره قرارداد کېږي.»
د ټولګټو وزارت ویاند دغهراز وایي چې د حیرتان – مزارشریف د سړک رغونه له ۸۰ سلنه پرمختګ سره، د ترسره کېدو په حال کې ده او په تمځایونو کې د رغونې د پاتې چارو له امله د یادې پروژې تړون د ازبیکستان د وسپنې پټلۍ له ادارې سره د شپږو نورو میاشتو لپاره غځول شوی دی.
د ټولګټو وزارت ویاند محمد اشرف حقشناس زیاتوي:«د دې په برخه کې چې، موږ له خپلو ګاونډیو هېوادونو سره لېږد رالېږد ولرو، د ټولګټو وزارت مشرتابه چې په دې وروستي کې دغو هېوادونو ته سفرونه لرل له نېکهمرغه په څلور اړخیز دهلېز کې چې، موږ د افغانستان، ازبیکستان، قرغیزستان او چین هېوادونو ترمنځ لرله، هوکړهلیک یې ۲۰۲۵ کال ته هم غځېدلی دی.»
دغهراز په تېرو لسو میاشتو کې د حیرتان، اقینې، تورغنډۍ او خواف – هرات د بندرونو له لارې ۳ اعشاریه ۵ مېلیون مټریک ټنه لېږد رالېږد شوی دی. دمګړۍ د سړک جوړولو پر نږدې ۵۰ نورو پروژو هم کار روان دی.
