دید خبری اژانس: د کویت امیر د پارلمان له منحل کیدو وروسته د یوه فرمان په صادرولو سره شیخ احمد عبدالله الصباح د کابینې د جوړولو مسول وباله.
د شیخ مشعل الاحمد الجابر الصباح د حکم له مخې، عبدالله علي ال یحیی، عماد العتیقي، انور علي المنذف د بهرنیو چارو، تیلو او مالیې وزیرانو په توګه خپل موقفونه ساتلي دي.
شیخ احمد عبدالله الاحمد الصباح د امیر وراره دی او مخکې د اپریل په میاشت کې د لومړي وزیر په توګه ټاکل شوی و.
نوی حکومت د جمعې په ورځ د پارلمان له منحل کیدو لږ وروسته د حکومت او منتخب پارلمان تر منځ د اوږدې مودې له ناندریو وروسته جوړ شو.
د پارلمان د منحلولو پر مهال، د کویت امیر د اساسي قانون ځینې اصول وځنډول، په شمول د هغه څه چې ویلي یې وو چې د نوي پارلمان غړي باید د منحل کیدو په دوو میاشتو کې وټاکل شي او قوانین باید د پارلمان او امیر لخوا تصویب شي.
دا په روان کال کې دویم ځل دی چې د کویټ پارلمان د دغه هېواد د امیر له خوا منحل کېږي.
