د کوچني اختر په مناسبت؛ نږدي ۶ زره بندیان آزاد او د بند په موده کې تخفیف ورکړل شوې
دید خبرې آژانس: د اسلامي امارت سترې محکمې د نېکمرغه کوچني اختر په مناسبت د هېواد له بندخونو څخه نږدي ۶ زره بندیانو د ازادېدو او د بند په موده کې د تخفیف ورکولو خبر ورکړی دی.
سرچینې د یوې خبرپاڼې په خپرولو سره ویلي چې د افغانستان اسلامي امارت د محترم مشر د (۴۴۱۴) ګڼې او ۲۸/۸/۱۴۴۵ هـ ق نېټې د حکم او د سترې محکمې د رئیس او قاضي القضات شیخ عبدالحکیم حقان په لارښوونه د یوې مشخصې کړنلارې پر بنسټ د هېواد په کچه له بندخونو څخه ۵ زره ۶۱۵ مستحق بندیان له بنده ازاد او یا د بند موده کې تخفیف ورکړل شو.
د خبرپاڼې د مالوماتو له مخې د یادو بندیانو له ډلې ۲زره ۴۶۳ هغه بندیان چې د عفوې مستحق وو، خوشي شول او ۳زره ۱۵۲ نور بندیان، چې د تخفیف وړ وو د بند په موده کې تخفیف ورکړل شو.
په خبرپاڼه کې څرګنده شوې، چې د کوچني اختر په مناسبت د بندیانو د هیئتۍ لپاره کړنلاره د سترې محکمې د قضائي تفتیش د عمومي رئیس په مشرۍ د یوه مؤظف پلاوي له لوري، چې د قضائي تفتیش عمومي ریاست مرستیال، د زندانونو چارو د سمون ادارې استازي، د کورنیو چارو وزارت د جرمونو د کشف لوی ریاست استازي، د کابل ولایت د جنايي څېړنو استازي، د احکامو او فرامینو د تعقیب لوی ریاست استازي او د استخباراتو لوی ریاست استازي یې غړیتوب درلود، له لوري ترتیب او سترې محکمې د عالي مقام د دفتر ریاست له لوري په مکتوبي بڼه د عالیقدر امیرالمؤمنین حفظه الله تعالی محترم مقام ته وړاندې شوی وو.
