د کندهار په برښنا ریاست کې فساد

د ولايتي شورا رئيس وايي، د برېښنا رياست تېل په ښکاره په ټانکرانو کي خرڅېږي

د ولايتي شورا نوبتي غونډه چي د شورا د رئيس حاجي سيد جان خاکرېزوال په مشرۍ جوړه سوې وه پر مهال يې مرستيال حاجي عبدالقيوم بارکزي، منشي او نژدې ټولو غړو برخه اخيتسې وه. د ولايتي شوراپه غونډه کي پر ګڼو نورو موضوعاتو هم بحث وسو او په اړه يې مهم تصميمونه ونيول سوه.
د ولايتي شورا د يک شنبې په غونډه د شورا رئيس حاجي سيد جان خاکرېزوال وويل، د برېښنا رياست هغه تېل چي د جېنټرانو د برق لپاره راځي زيات يې خرڅېږي.
ښاغلي خاکرېزوال وويل، د برېښنا رياست صنعتي پارک ته ترو برېښنا ورکړي او بيل يې هم کم مصرفه وي، خو د عام ولس د کورونو بيلونه دوه برابره وي.
هغه وويل، که د برېښنا رياست اړوند يادي ستونزي دا ځل حل نه سي، نو اړ دي، چي د حل په موخه يې مرکز کابل ته ولاړ سي او حل ته د لوړ پوړو چارواکو سره ستونزي شريکي کړي.
د شورا په نننۍ غونډه کي ښاغلي خاکرېزوال همداراز وويل، په کندهار کي وهابيان د شريعت څخه خلاف خبري کوي او اسلام کي ناروا کړني روا بولي.
نوموړي وويل، د شورا راتلونکي غونډي ته وهابيان راغواړي او د دې بې بنسټه فتوا وو په اړه خبري ورسره کوي، څو په راتلونکي کي د دوی د داډول څرګندونو مخه ونيسي.
د شورا رئيس همدارنګه وويل، چي د ځينو پر مختيايي پروژو په داوطلبي کي فساد کېږي او ځيني کسان د خپلو شخصي ګټو لپاره پروژې په خپله نفه پای ته رسوي. هغه وويل، ياده موضوع به د کندهار والي او مرستيال والي سره شريکه کړي او د پروژو په برخه کي به فساد له منځه يوسي.
د ولايتي شورا غړي محمديوسف يونسي بيا وويل، چي د کندهار روزګان لويه لاره خرابه ده او دامهال مسافر له ګڼو ستونزو سره مخ دي.
هغه غوښتنه وکړه، چي د يادي لاري د رغوني په موخه دي شورا هلي ځلي وکړي او دغه لار دي د مسافرو د تګ را تګ لپاره په پاخه او اساسي شکل ورغوي.
د يادولو وړده، چي د شورا په نننۍ غونډه کي د ګڼو عامو خلګو پر عرض پاڼو باندي هم بحث وسو او په اړه يې لازم تصميمونه ونيول سوه.