دید خبرې آژانس: د اسلامی امارت د ریاستالوزراء اقتصادي مرستیال ملا عبدالغني برادر اخوند، پرون د کابل د پغمان ولسوالۍ د ارغندۍ ترانسپورټي ترمینل د چارو د پيل پرانیسته کړې ده.
د ریاستالوزراء اقتصادي معاونیت د مطبوعاتي دفتر د معلوماتو له مخې؛ ملا عبدالغني برادر اخوند په همدې مناسبت جوړو شویو مراسمو کې، د ارغندۍ ترانسپورټي ترمینل جوړول، په هېواد کې د ترانسپورټي زېربنا د پراختیا په برخه کې مهم بللی او ویلي یې دي چې د ترانسپورټي زېربناوو معیاري رغول او پراخول؛ د یو هېواد د اقتصادي ودې، پرمختګ او د داخلي او سیمه ییز اتصال لپاره ډېر مهم او بنسټیز ګام ګڼل کېږي.
هغه زیاته کړې ده: له بدهمرغه په هېواد کې د لسیزو جګړو او فساد له امله دې مهمې برخې ته پام نه دی شوی؛ بلکې په دې برخه کې شته زېربنا د ټیټ کیفیت له امله تخریب شوې، عامه ملکیتونه د اشخاصو له لوري غصب او د لویو لارو او سړکونو حریمونه کوچني شوي دي.
ملا برادر اخوند، د معیاري ترانسپورټي زېربنا ارزښت ته په اشارې سره ویلي چې په ترانسپورټي او مواصلاتي زېربناوو کې پانګونه، د غصب شویو عامه ملکیتونو بېرته استرداد، د سړکونو او لارو د اصلي حریم تشخیصول او رغول د افغانستان اسلامي امارت یو له اساسي او مهمو ملي موخو څخه ګڼل کېږي او په همدې موخه دا دی نن د ارغندۍ ترانسپورټي ترمینل عملي چارې پيلېږي، چې ۴۲ مهم تاسیسات پکې جوړېږي.
د هغه په وینا، اسلامي امارت د عصر اړتیاوو او امکاناتو ته په کتو، نه یوازې د ترانسپورټي زېربناوو د رغولو او پراخولو په برخه کې کلک هوډ لري، بلکې د نورو بنسټیزو ستراتیژیکو موخو د ترلاسه کولو په برخه کې هم خپلو هڅو ته دوام ورکوي.
د ریاستالوزراء اقتصادي مرستیال د خپلو خبرو په پای کې، له قراردادي شرکت څخه غوښتي چې د یادې پروژې چارې په ښه کیفیت او ټاکلي وخت کې بشپړې کړي.
د یادونې وړ ده چې د کابل ولایت د ارغندۍ ترانسپورټي ترمینل په شاوخوا ۹۰۰ جریبه ځمکه کې د یو میلیارد او ۲۸۵ میلیونو افغانیو په لګښت جوړېږي چې چارې به یې د خصوصي سکټور له لوري په دوو کلونو کې بشپړې شي. د دغه ترمینل په جوړېدو سره به ترانسپورټي اسانتیاوې زیاتې شي، د انتقال اړوند چارو په چټکتیا او غوره تنظیم کې به مهم رول ولوبوي او همدا رنګه ترانسپورټي لګښتونه او ترافیکي ستونزې به کمې او ډېرو هېوادوالو ته به د کار زمینه برابره شي.
