د ښځو نړۍواله ورځ؛ د افغان ښځو پر ملاتړ ټینګار شوې
دید خبرې آژانس: ګڼو نړۍوالو بنسټونو د مارچ اتمې یا هم د ښځو نړۍوالې ورځې په مناسبت د افغان ښځو پر ملاتړ او د هغوی حقونو ته د درناوي پر اړتیا ټینګار کړی دی.
افغانستان کې د ملګرو ملتونو د ښځو څانګه وایي، پر افغان ښځو پانګونه د افغانستان پر راتلونکي پانګونه ده.
دغه سازمان په دې اړه یوه پيغام کې ویلي، افغان ښځې د ګڼو ننګونو سره سره د خپلو حقونو لپاره مبارزه کوي.
د ملګرو ملتونو علمي، کلتوري او ښوونیز بنسټ (یونسکو) د افغان ښځو او نجونو د حقونو د بیا را ژوندي کولو غوښتنه کړې او ویلي یې دي چې د دوی غږ به نړۍ ته ورسوي.
یونسکو پر افغان نجونو ښوونیز بندیز ته په اشارې ویلي، تر دې مهاله ۱.۵ میلیونه نجونې له زدهکړو محرومې شوي او که دا بندیز دوام ومومي، دغه شمېر به تر ۲۰۳۰ کاله له ۴ میلیونو واوړي.
د ملګرو ملتونو د خوړو او کرنې سازمان (FAO) هم ویلي، کرنیز سکټور کې پر ښځو پانګونه ټولنې پیاوړې کوي، لوږه کموي او د افغانستان راتلونکی تضمینوي.
دغه سازمان د ښځو نړۍوالې ورځې په مناسبت پر خپله اېکس پاڼه لیکلي: «موږ د کرنې په برخه کې د افغان ښځو ستاینه کوو؛ هغه ښځې چې د خوراکي امنیت، اقتصادي ودې او د لوږې پر وړاندې مبارزه کې مهم رول لري.»
د بشري حقونو د څار سازمان بیا ویلي، د ښځو نړۍوالې ورځې په مناسبت د افغان ښځو زړورتیا او مقاومت ستايي.
دغه بنسټ ټینګار کړی چې: «افغان ښځې په سختو شرایطو کې خپل برخلیک کنټرولوي، لاریونونه کوي، د خپلو حقونو د سرغړونې قضیې را برسیره کوي.»
د ملګرو ملتونو د ماشومانو د ملاتړ صندوق (یونیسف) ویلي، نه یوازې د ښځو په نړۍواله ورځ، بلکې هره ورځ د افغان ښځو ترڅنګ ولاړ دي.
د مارچ اتمه په ټوله نړۍ کې د ښځو لپاره د برابرو حقونو په موخه د مبارزې د سمبول په توګه نمانځل کیږي.
