د چارو ادارې رییس هېواد کې د قومونو او مذهبونو ترمنځ پر یووالي ټينګار وکړ
دید خبرې آژآنس: د چارو ادارې رییس وایي، د اسلامي امارت د رهبر د فرمان لمخې هیڅوک ددې حق نلرې چې له بل چا غچ واخلي.
د کابل په لوېدیځ کې د اهل تشیح د دیني عالمانو له لوري په جوړه شوې غونډه کې، د اسلامي امارت ځينو چارواکو هم ګډون کړی دی.
د چارو ادارې رییس د اسلامي امارت د عمومي بښنې فرمان ته په نغوتې سره وایي، چې افغانستان د خپل تاریخ په یوه بېل پړاو کې دی او سرپرست حکومت تر ډېره پر راتلونکي تمرکز لري نه پر تېر .
د چارو ادارې رییس، نورالحق انور په دې اړه وايي:«اسلامي امارت راتلونکي ته ګوري، نه تېر ته. پر همدې بنسټ عمومي عفو اعلان شوې او حتی هغه کسان چې شل کاله یې د اسلامي امارت پر ضد جګړه کړې، هم په دې عفو کې شامل دي. هېچا ته اجازه نهورکول کېږي چې د انتقام اخیستو هڅه وکړي.»
د کور او ښارجوړونې وزارت معین هم د دغه پروګرام د جوړوونکي په توګه وایي چې هزاره او اهل تشیع افغانانو د تاوتریخوالي باب تړلی دی او له اوسني نظامه هر اړخیز ملاتړ کوي.
د کور او ښارجوړونې وزارت معین، مدار علي کریمي بامیاني وايي: «قومي، ژبني او مذهبي اختلافونه باید بیا تکرار نهشي. موږ ټول باید له تېرو تجربو درس واخلو.»
له بلې خوا، د بامیان والي عبدالله سرحدي وایي، د اختلافاتو او تفرقو له امله افغانان د ډېرو کلونو په اوږدو کې زیانمن شوي دي او اوس د سرپرست حکومت چارواکي دنده لري چې د خلکو او مذهبونو تر منځ د بې اتفافۍ له زیانونو خلک خبر کړي.
عبدالله سرحدي هم د اوسني نظام دفاع د ټولو هېوادوالو بنسټيزه دنده ګڼي.
هغه وايي: «موږ، د افغانستان هزاره ټولنه، د تاوتریخوالي او کرکې پړاو ته د پای ټکی ایښی دی. څنګه چې موږ پخوا له نورو قومونو سره وروري لرله، اوس هم دا وروري دوام لري، همداسې نهده چې موږ بیل قوم یو.»
د دې غونډې ویناوالو د اسراييل له خوا د غزې د اوسېدونکو پر وړاندې پرله پسې بریدونه غندلي او دغه راز یې د اسراييل د لومړي وزیر بن یامین نتن یاهو د محاکمې غوښتنه یې کړې ده.
