د څه باندې ۱۲۸ زره ډالرو په ارزښت؛ د یوې چاپېریالي پروژې هوکړه لیک لاسلیک شو

دید خبرې آژانس: د چاپېریال ساتنې ملي ادارې د پالیسۍ او مسلکي معین ډاکټر زین العابدین عابد او د «ټي‌ال‌او» اړیکو دفتر مؤسسې مرستیال عبدالرحیم خرم،(د طبیعي سرچینو او چاپېریالي پروژې د تطبیق په برخه کې) د ګډې همکارۍ هوکړه لیک لاسلیک کړی دی.

د چاپېریال ساتنې ملي ادارې د معلوماتو له مخې؛ د یادې پروژې ارزښت ۱۲۸ زره ۶۳۹ امریکایي ډالر دی او موخه یې له اقلیمي بدلون سره سازښت او د چاپېریالي ګواښونو په تړاو د ټولنو او خلکو د عامه پوهاوي کچې او ظرفیت لوړول دي چې د ۲۰۲۵ میلادي کال په بهیر کې به د هېواد په مرکز او ولایتونو کې پلې شي.

د چاپېریال ساتنې ملي اداره هڅه کوي چې هېوادوالو ته د پاک او سمسور چاپېریال د رامنځته کولو په موخه، بېلابېلې چاپېریالي پروژې راجلب او په هېواد کې یې پلې کړي.