دید خبری آژانس: د ترکیې د کورنیو چارو وزارت اعلان وکړ چې هیواد ته یې د کډوالو د ننوتو د مخنیوي لپاره پوستې او ګرځنده ګزمې زیاتې کړي دي.
د ترکیې د کورنیو چارو وزیر علي یرلیکایا پرون (سه شنبه، د کب ۸) د ترکیې په ۳۰ ښارونو کې د ناقانونه پناه غوښتونکو د پېژندلو لپاره د پوستو او ګرځنده ګزمو د زیاتولو اعلان وکړ.
هغه وویل چې د تیر کال د جولای میاشتې راهیسې یوازې په استانبول کې ۵۶۶۲۰ غیر قانوني پناه غوښتونکي پیژندل شوي او د اخراج مرکزونو ته استول شوي دي.
د ترکي رسنیو د راپورونو پر بنسټ، علي یرلیکایا د غیرقانوني پناه غوښتونکو د ننوتلو د مخنیوي لپاره د بهرنیو اتباعو د چک کولو او پیژندلو لپاره د ګرځنده موټرو او ځایونو زیاتوالی ګڼلی دی.
هغه زياته کړه، هغه بهرنيان چې د زېږون سندونه او اړين اسناد نه لري، نيول کېږي او د اخراج مرکزونو ته به وړل کېږي.
علي یرلیکایا په ترکیه کې د غیر قانوني مهاجرت یادونه وکړه او ویې ویل چې د غیرقانوني پناه غوښتونکو او قاچاق وړونکو سره د مبارزې په برخه کې څلور ګامونه اخیستل شوي دي، د پناه غوښتونکو په اصلي هیوادونو کې د ستونزو حلول، د سرحدي امنیتي تدابیرو سختول، د پناه غوښتونکو پیژندل او نیول او په نهایت کې یې نورو هیوادونو ته اخراج کول
علي یرلیکایا وویل چې په تیر کال کې ټولټال ۶۱,۴۲۹ غیرقانوني اتباع پیژندل شوي او د اخراج مرکزونو ته لیږل شوي دي. نوموړي زیاته کړه، چې په تېرو اوو میاشتو کې په استانبول کې د قاچاق وړونکو پر ضد ۴۹۳ عملیات شوي او ۷۹۸ قاچاق وړونکي نیول شوي دي.
ترکیه د اسیا او اروپا ترمنځ د نښلوونکې اړیکې په توګه د ډیرو پناه غوښتونکو موقت ځای دی چې اروپا ته د قانوني او غیر قانوني لارو له لارې دغه هیواد ته داخلیږي. په وروستیو میاشتو کې ترکیې د کډوالو د پېژندنې، نیولو او شړلو بهیر ګړندی کړی او زرګونه کډوال چې اکثره یې افغانان دي، توقیف او شړلي دي.
