د ټاپي پروژې د چاپیریال ساتنې اړوند جواز لیک لاسلیک شو

د چاپیریال ساتنې ملي ادارې نن، د صنعت او سوداګرۍ، کانونو او پترولیم وزارتونو د استازو په حضور کې د ټاپي لیمټډ پایپ لاین کمپنۍ عامل مدیر ته د ټاپي پروژې د چاپیریال ساتنې اړوند جواز لیک ورکړ.

د چاپیریال ساتنې ملي ادارې نن، د صنعت او سوداګرۍ، کانونو او پترولیم وزارتونو د استازو په حضور کې د ټاپي لیمټډ پایپ لاین کمپنۍ عامل مدیر ته د ټاپي پروژې د چاپیریال ساتنې اړوند جواز لیک ورکړ.
په ورته وخت کې په مالي او بانکي چارو کې د ولسمشر ستر سلاکار او د صنعت او سوداګرۍ وزارت سرپرست، اجمل احمدي، چې د پنجشنبې په ورځ یې په همدې تړاو په یوه خبري ناسته کې وینا کوله، زیاته کړه: د افغانستان حکومت د چاپیریال ساتنې د سټنډردونو په ګډون له غوره نړیوالو سټنډرډونو سره سم د ټاپي پروژې له پلي کېدو څخه خپل ملاتړ ته دوام ورکوي.
احمدي زیاته کړه چې په افغانستان کې د ټاپي پروژې اړوند د ماین پاکۍ سروې، د ټولنیزو او چاپیریالي اغېزو سروې، د ځمکې د پلان جوړونې او استملاک سروې، جیوتخنیکي سروې او لیدر (بتیمتریک، توپوګرافي) سروې بشپړې شوې دي.
په همدې حال کې د ټاپي لمټډ پایپ لاین کمپنۍ عامل مدیر، محمد میرات امانوف، دې ته په ټینګار سره چې د چاپیریال ساتنې او ساتندویه اړتیاوې د یوې پروژې د پیل مهمې برخې دي، زیاته کړه: هڅه شوې چې د ټاپي پروژې ساتندویه اړتیاوې د نړیوال بانک، آسیا پراختیایي بانک او IFC له سټنډردونو سره مطابقت ولري
امانوف وویل: د ټاپي نل لیکې پروژه دوه پړاوونه لري په لومړي پړاو کې به یوه نل لیکه چې په کال کې د ۱۱ بیلیون کیوبیک مترو ګازو د لیږد وړتیا لري نصب شي او په دوهم پړاو کې اټکل شوې چې ۶ پايې کمپریسوره نصب شي، چې د نل لیکې ظرفیت به نور هم لوړ کړي.
د دغو دواړو پړاوونو په بشپړیدو سره به په کال کې ۳۳ بیلیون کیوبیک متر طبیعي ګاز د یادې نل لیکې له لارې د یوې زماني دورې یعني ۳۳ کلونو لپاره و لیږدول شي.

د کانونو او پترولیم وزارت مرستیال، سید محبوب الله رباني دې ټکي ته په ټینګارچې د ټاپي پروژې پلي کول نه یوازې د هوا او د ژوند د چاپیریال د ککړتیا د کمولولامل ګرځي بلکې زموږ هیواد ته د پاکې ایکولوژیکي انرژۍ سرچینې وړاندې کوي. هغه زیاته کړه د ټاپي د پروژې نه د برېښنا د ترلاسه کولو لپاره د ګازو چمتو والی چې د انرژۍ لامل ګرځي د سون د نورو توکو او انرژۍ لکه د ډبرو سکرو ، ډیزلو او نفتو د انرژۍ ځای ونیسي چې د کاربن ډای اکساید د خپریدو د راکمولو لامل به وګرځي.
د چاپیریال ساتنې ملي ادارې رییس، شاه زمان میوندي،ټاپي پروژې ته د چاپیریال ساتنې اړوند جواز لیک په ورکړې سره وویل: د ټاپي شرکت د ټاپي پروژې د مالک په توګه د چاپیریالي او ټولنیزو اغیزو د ارزونې رپوټ چمتو او د چاپیریال ساتنې جواز لیک د اخیستو لپاره یې د چاپیریال ساتنې ملي ادارې ته وړاندې کړی وو.
ده زیاته کړه چې دغه رپوټ د چاپیریال د قانون او مقررې مطابق د چاپيریال ساتنې د ملي ادارې د متخصصینو د ټیم لخوا په دقیقه توګه ارزول شوی او له تخنیکي بحثونو وروسته د تایید وړ ګرځیدلی دی.
د ټاپي پروژه د افغانستان د اقتصاد لپاره فوق العاده اقتصادي پراختیا رامنځته کوي، ځکه له طبیعي ګازو څخه د برېښنا تولید له ډیزلو او نفتو څخه خورا ارزانه دی. دغه پروژه طبیعي ګازو، صنعتي کیدو او پانګونې ته لاسرسی په خوځښت راولي.