دید خبرې آژانس: د افغانستان د فوټسال ملي لوبډلې د برازیل څلور اړخیزو نړیوالو دوستانه سیالیو کې درېیم مقام خپل کړ.
د المپیک، بدني روزنې او سپورټ عمومي ریاست ویلی، چې افغان لوبډلې د ګرینلنډ پر وړاندې سیالي دوه – دوه مساوي کړه، خو په پینالټیو کې یې د ۴ – ۲ توپیر سره بریا ترلاسه کړه.
په دې سیالۍ کې حسین محمدي او محمد جواد صفري د افغانستان په ګټه ګولونه ووهل.
د یادو سیالیو اتلولي برازیل وګټله، ایران دویم مقام خپل کړ او ګرینلنډ څلورم مقام ته ورسېد.
د یادونې وړ ده، چې دا سیالۍ د افغانستان، ایران، ګرینلنډ او برازیل ترمنځ د مارچ پر ۳مه پیل او د مارچ پر ۹مه پای ته ورسېدې.
