دید خبرې آژانس: ځینې افغان کروندګر چې د هینګې پر بوټي یې پانګونه کړې، په بازارونو کې د دغه کرنیز محصول د بیو ټیټېدو ته اندېښمن دي.
دوی وایي، یوه کیلو اینجه چې پخوا ۲۵ زره افغانۍ وه، اوس په ۷ زره افغانۍ پلورل کیږي.
کروندګر، عبدالحی وایي: « موږ اینجه د ښه پلور په هیله کرلې خو سږ کال یې بیې ټیټې شوې دي. اوس په ۳ زره یا څلور زره افغانۍ پلورل کیږي، چې سره له دې چې ګټه نه کولي، موږ ته تاوان هم رسوي.»
بل کروندګر، عبدالاحمد و ویل: « موږ دا ټول محصول د حلالې روزۍ د ګټلو په موخه کرلی. تېر کال یې بیه له ۲۰ تر ۲۵ زرو وه، خو سږ کال ۷ زره یا ۸ زره افغانیو ته را کمه شوې ده.»
ځینې نور کروندګر د اسلامي امارت له مسوولینو غواړي چې دغه ارزښتناک بوټي ته په کور دننه او بهر بازارونه رامنځته کړي.
کروندګر، غلام نبي و ویل: «موږ له حکومته غواړو چې د اینجې لپاره د سوداګریزې هوکړې وکړي، ځکه دا محصول په نړۍوالو بازارونو کې ډېر غوښتونکي لري.»
بل کروندګر، نسیم و ویل: «موږ له حکومته هیله لرو چې د اینجې لپاره بهرني بازارونه پیدا کړي، ترڅو موږ ته زیان ونه رسیږي او وکولای شو له دې لارې حلاله روزي وګټو.»
بلخوا، د کرنې، اوبو لګولو او مالدارۍ وزارت وايي، د اینجې بیه د دې بوټي د نړۍوال تولید د زیاتوالي له امله ټیټه شوې ده.
د دغه وزارت ویاند د اینجې د پلور لپاره د نړۍوالو بازارونو د جوړېدو په برخه کې هم د هڅو ډاډ ورکوي.
د کرنې، اوبو لګولو او مالدارۍ وزارت ویاند، مصباحالدین مستعین و ویل: « په نړۍواله کچه د اینجې تولید ډېر شوی، چې دغه چاره یې د بیو د کمېدو لامل شوې ده. داسې نه ده چې که په ګاونډیو هېوادونو کې د اینجې بیه لوړه وي او زموږ د محصول به ارزانه پلورل کیږي. موږ هڅه کوو چې دغه محصول ته په نړۍوالو بازارونو کې ښه ځای پیداکړو.»
د هینګې بوټی چې په درملو او خوراکي توکو کې کارول کیږي، تر ډېره د افغانستان په شمالي سیمو کې کرل کیږي او په ډېرو هېوادونو کې ځانګړي پېرودونکي لري.
دغه بوټی په نړۍواله کچه لوړ اقتصادي ارزښت لري او د کرنې، اوبو لګولو او مالدارۍ وزارت له لوري کروندګرو ته د کوکنارو د بدیل کښت په توګه معرفي شوی دی.
