د هوايي ډګرونو له لارې؛ د ۲۹۲میلیونه ډالرو په ارزښت صادرات او واردات شوي دي

دید خبرې آژانس: د صنعت او سوداګرۍ وزارت مسوولین وايي چې په روان ۱۴۰۳ مالي کال کې د هېواد د درېیو هوايي ډګرونو له لارې، د ۲۹۲میلیونه ډالرو په ارزښت صادرات او واردات شوي دي.

د صنعت او سوداګرۍ وزارت ویاند اخندزاده عبدالسلام جواد، ویلي چې د روان ۱۴۰۳ مالي کال په بهیر کې د کابل، کندهار او بلخ هوايي ډګرونو له لارې د ۲۹۲میلیونه ډالرو په ارزښت صادرات او واردات شوي چې له دې جملې څخه ۱۲۵ میلیونه یې صادرات او ۱۶۷ میلیونه یې ورادات دي.

د هغه په وینا، دغه صادرات او واردات اتریش، اردن، اسپانیا، متحده عربي اماراتو، اندونیزیا، انګلستان، امریکا، جنوبي افریقا، آلمان، چین، هند او نورو هېوادونو ته شوي دي.

ویل شوي چې په یادو صادراتو او وارداتو کې وچې میوې، زعفران، انځر، عناب، جلغوزي، نوې جامې، لاسي صنایع، درمل او برېښنایی وسایل شامل دي.