دید خبرې آژانس: د هرات د کانونو او پټرولیم ریاست مسوولین وايي، د دغه ولایت په کانونو کې دوه زره او ۵۰۰ کارګر په کار بوخت دي.
مسوولین دغه راز وايي، په نږدې راتلونکې کې به د دغه ولایت د څو سترو کانونو د استخراج چارې پیل شي چې زرګونه نورو کارګرو ته به هم د کار زمینه برابره شي.
د هرات د کانونو او پټرولیم رییس، سیف الله لونګ ویلې: « اوسمهال ۱۸۰۰ کسان په ۲۶ کانونو کې کار کوي، [نږدې ۷۰۰ کسان په لویو کانونو کې بوخت دي.] هیله لرو چې دا شمېر په راتلونکي کې زیاته شي.»
په کانونو کې کار ډېر ستونزمن او له کړاوه ډک دی خو ډېری کارګرانو لپاره د کورنیو لګښتونو پوره کولو ښه سرچینه ده. ځینې دغه کارګران خوشحاله دي چې ګاونډیو هېوادونو کې د کار پرځای په کوردننه ورته د کاري زمینه برابره شوې ده.
د هرات د کانونو او پټرولیم ریاست د شمېرو پر بنسټ، دغه ولایت کې شپږ ستر او ۳۶ کوچني کانونه شته چې له ډلې یې د یوه ستر کان د استخراج چارې او د پنځو نورو کانونو د اکتشاف چارې روانې دي. دغه راز د هرات د ۳۶ کوچنیو کانونو د استخراج لړۍ هم پیل شوې ده.
