دید خبرې آژانس: د کار او ټولنیزو چارو وزارت د نېکمرغه کوچني اختر د رخصتۍ ورځې او له روژې مبارکې میاشتې څخه وروسته د کار د پیل او پای وختونه مشخص کړل.
یاد وزارت په راستول شوې اطلاعیه کې ویلي، چې د شوال المکرم لومړۍ ورځ، چې د نېکمرغه کوچني اختر له لومړۍ ورځې سره برابره ده، په ټول هېواد کې درې کاري ورځې عمومي رخصتي ده.
د سرچینې د مالوماتو له مخې په همدې توګه د روژې له مبارکې میاشتې څخه وروسته د مرکزي او ولایتي کارکوونکو د کار پیل او پای موده به د وږي د میاشتې تر پایه له شنبې څخه تر چهار شنبې پورې کار پیل د سهار له ۸ بجو څخه د مازدیګر تر ۴ بجو، همدا شان د غرمې ډوډۍ او د ماسپښين د لمانځه لپاره له ۱۲ څخه تر یوې بجې پورې یو ساعت وقفې سره.
په همدې توګه د پنجشنبې ورځې د کار پیل د سهار له ۸ بجو څخه د ماسپښين تر یوې بجې پورې بې له وقفې څخه وي.
یاد وزارت څرګنده کړې، چې تولیدي او خدماتي موسسې، په دایمه توګه فعالې برخې، نشراتي، روغتیايي، پوهنیزې او د لوړو زده کړو موسسې دې د خپلو کاري او اقلیمي شرایطو په پآم کې نیولو سره ، د کار پیل او پای خپل مهالوېشونه، اړونده لایحې او مقرراتو په نظر کې نیولو سره تطبیق کړي.
