د نړیوال پروګرام خبرداری: موږ د اکتوبر څخه وروسته د مرستې لپاره فنډونه نلرو

دید خبری آژانس: د خوړو نړیوال پروګرام (WFP) اعلان کړی چې د بودیجې له کمښت سره به یوازې د څو میاشتو لپاره د افغانستان د خلکو لپاره خوراکی مواد برابر کړی او له هغې وروسته به د دغه سازمان منابع ختمې شی.

په افغانستان کې د خوړو د نړیوال پروګرام مشر هیساو ویلی وايي، دغه سازمان د ۲۰۲۳ کال له اکټوبر وروسته د افغانستان خلکو ته د خوراکي توکو د مرستې لپاره لازمې سرچینې نه لري.

لی رویټرز ته وویل: موږ د څو نورو میاشتو لپاره د پنځو ملیونو خلکو خدمت کولو توان لرو، مګر له هغې وروسته موږ سرچینې نه لرو.

په افغانستان کې د خوړو د نړیوال پروګرام مشر وویل: زه فکر کوم چې دا زموږ د وضعیت بیړنیتوب څرګندوي.

د خوړو نړیوال پروګرام اټکل کړی چې له اوسنۍ بودیجې او د نړۍ د هېوادونو له خوا له افغانستان سره ژمنه شوې مرستې سره به د دغه هېواد خلکو ته د خوراکي خدمتونو په وړاندې کولو کې کموالی د اګست په میاشت کې پیل شي، د سپټمبر په میاشت کې به زیات شي او دغه بهیر به پیل شي. د دې مرستو چمتو کول به د اکتوبر په میاشت کې پای ته ورسیږي.

د نړیوال خوراکي پروګرام د افغانستان د څانګې مشر ویلي دي چې دغه سازمان د افغانستان له خلکو سره د مرستې لپاره د ۲۰۲۴ کال تر مارچ میاشتې پورې یو میلیارد ډالرو مرستو ته اړتیا لري.

تر دې مخکې په افغانستان کې د ملګرو ملتونو د بشري مرستو د همغږۍ دفتر (OCHA) اعلان کړی و چې د روان کال تر پایه د افغانستان له خلکو سره د مرستې لپاره ۲.۲۶ میلیارد ډالرو ته اړتیا ده.

دې ادارې همداراز راپور ورکړی چې اوسمهال په افغانستان کې ۲۸.۸ میلیونه خلک بشري مرستو ته اړتیا لري.