د مهاجرینو وزارت: د مهاجرینو لپاره د ایران څخه مننه کوو/د پناه غوښتونکو بیرته راستنیدو ته زمینه چمتو دی
ډید خبري آژانس: د مهاجرینو او راستنیدونکو چارو وزارت وايي، د افغان کډوالو لپاره له ایران او پاکستان څخه مننه کوي او اوس افغانستان ته د کډوالو د راستنیدو لپاره زمینه برابره شوې ده.
د کډوالو او راستنیدونکو چارو وزارت په کابل کې د ملګرو ملتونو د استازي په حضور کې د کډوالو نړیواله ورځ ولمانځله.
د مهاجرینو او راستنیدونکو چارو وزارت سرپرست خلیل الرحمن حقاني وايي، سازمانونه او دوست هېوادونه د افغان کډوالو د ستونزو د هواري مسوولیت لري.
ښاغلي حقاني زیاته کړه چې هېواد ته د کډوالو د راستنېدو لپاره شرایط برابر شوي او په تېر یوه کال کې له ۲ میلیونو ډېر کډوال هېواد ته راستانه شوي دي.
د مهاجرینو چارو وزیر وویل، موږ له ایران او پاکستان څخه مننه کوو چې له کلونو راهیسې یې د افغان کډوالو کوربه توب کړی او له هغوی یې غوښتي چې د افغان کډوالو بشري او اسلامي حقونه تامین کړي.
هغه زياته کړه، په افغانستان کې د ټوليز امنيت له امله له ګاونډيو هېوادونو څخه څه باندې دوه ميليونه کډوال هېواد ته راستانه شوي او د ملګرو ملتونو مرسته د کډوالو د ستونزې په هواري او د هغوى د مېشتېدو په برخه کې رغنده رول لوبوي.
ښاغلي حقاني زیاته کړه چې موږ نړیوالو موسسو ته ډاډ ورکوو چې مرستې په بشپړ شفافیت سره په افغانستان کې ویشل کیږي. ځینې نړیوال سازمانونه او بنسټونه د مهاجرینو سره د مرستې مسئله سیاسي کوي، پداسې حال کې چې د مهاجرینو مسئله له سیاست څخه جلا ده.
د کډوالو او راستنیدونکو چارو وزارت سرپرست وویل چې افغانستان له ګڼو ستونزو سره مخ دی او د ټولو د حل لپاره ډېر وخت غواړي او د کډوالو چارو وزارت د دغو ستونزو د حل لپاره د خلکو وړاندیزونه او نیوکې مني.
حقاني د خپلو خبرو په یوه بله برخه کې وویل چې امریکا او ملګري ملتونه دې د افغانانو پیسې وباسي او ملګري ملتونه دې د افغان کډوالو د اساسي حقونو په برابرولو کې همکاري وکړي.
ده زياته کړه: دغه وزارت له مرستندويه موسسو سره بيلابيل تفاهم ليکونه لاسليک کړي دي. نوموړي له مرستندويه بنسټونو وغوښتل، چې د دغه وزارت په همغږۍ او همکارۍ سره خپلې مرستې وويشي.
له بلې خوا د پاکستان په کمپ کې د افغان مهاجرینو د چارو رئیس عبدالاحد جواد وویل، موږ تمه لرو چې له ګاونډیو هیوادونو څخه د مهاجرینو د نړیوالو قوانینو پراساس د افغان مهاجرینو حقونه ورکړل شي.
د يادونې وړ ده، چې د افغانستان وګړي په تېرو لسيزو کې د ويجاړونکو جګړو له امله ګاونډيو هېوادونو او نړۍ ته کډه شوي دي.
