د مرکزي بغلان امنیه قومندان او درې تنه نور ووژل شول
دید خبرې آژانس: په بغلان ولایت کې سیمه ییز چارواکي وايي، په دغه ولایت کې د یوې ترافیکي پېښې له امله څلور تنه وژل شوي دي. د دې پېښې په قربانیانو کې د مرکزي بغلان ولسوالۍ امنیه قومندان اختر محمد هم شامل دی.
د بغلان ولایت د امنیې قوماندانۍ د رسنیو دفتر د جوزا په ۲۷مه، د یوې خبرپاڼې په خپرولو سره ویلی چې په دغه ولایت کې د یوې ترافیکی پېښې له امله څلور تنه وژل شوی دی.
په خبرپاڼه کې راغلي چې د دې پېښې په قربانیانو کې د بغلان مرکزي ولسوالۍ امنیه قومندان اختر محمد هم شامل دی.
دغه پېښه تېره شپه د بغلان مرکزي ولسوالۍ د پلچک غلام صادق په سیمه کې هغه مهال رامنځ ته شوه، چې د بغلان د مرکزي ولسوالۍ د امنیه قومندان او د هغه د ملګرو موټر له سړک څخه واوښت او چپه شو.
په همدې حال کې په وروستیو میاشتو کې په افغانستان کې ترافیکي پېښې زیاتې شوي دي.
د کورنیو چارو وزارت د ترافیکو پولیسو د عمومي ریاست د تازه شمېرو له مخې، په تېرو درېیو میاشتو کې په افغانستان کې ۱۲۶۵ ترافیکي پېښې شوي چې په پایله کې یې ۵۶۲ تنه مړه او ۱۷۹۲ ټپیان شوي دي.
