دید خبرې آژانس: په افغانستان کې د ناروې د کډوالو شورا لنډمهالې رییسه سوزي وان مېګن ویلي، چې افغانستان ته د امریکا د مرستو کمېدو د دغه بنسټ د مرستې رسونې پر بهیر هم منفي اغېز لرلی دی.
مېرمن وان مېګن وايي چې تېر کال افغانستان ته د راغلو مرستو ۴۰ سلنه د متحده ایالتونو وې او د دغو مرستو بندېدل یا کمېدل به د مرستندویو سازمانونو پر فعالیتونو منفي اغېز وکړي.
دا ټینګار کوي، چې په وروستیو میاشتو کې د سویس، بلجیم، هالنډ او برېټانیا په ګډون اروپایي هېوادونو هم له افغانستان سره خپلې مرستې کمې کړې دي.
سوزي وان مېګن وايي«په ۲۰۲۴ کال کې افغانستان ته د بشري مرستو له ۴۰ سلنې زیاتې مرستې د متحده ایالتونو وې؛ خو اوس ډېری ملي نادولتي موسسې او د ملګرو ملتونو بنسټونه د پام وړ کموالي شاهدان دي. دا زموږ لپاره په دې معنا ده، چې په افغانستان کې ډېری ټولنې پرېښودل شوي او هغه ملاتړ نه ترلاسه کوي چې ورته اړتیا لري.»
سوزي وان میګن له کوربه هېوادونو غواړي چې د افغان کډوالو حقونه خوندي کړي او زیاتوي چې دوی د کډوالو د ستونزې د حل لپاره له پاکستان سره هم په تماس کې دي.
په افغانستان کې د ناروې د کډوالو شورا لنډمهالې رییسه زیاتوي: «موږ له پاکستاني چارواکو سره د حل لارې موندلو لپاره خبرې کوو. ټول هغه هېوادونه چې د بې ځایه کېدو په کړکېچ کې ښکېل، دي کولای شي د افغانانو حقونه خوندي کړي او د دوی د ازاد او باعزته انتخاب ملاتړ وکړي.»
نوموړې زیاتوي چې د لسیزو جګړو او اقتصادي ننګونو له امله له شپږو مېلیونو ډېر خلک له خپلو کورونو بې ځایه شوي دي.
اغلې وان مېګن څرګندوي:«څومره چې موږ پوهېږو، اوسمهال په افغانستان کې له شپږو مېلیونو ډېر خلک بې ځایه شي دي. زموږ لپاره دا ډېره ګرانه ده، چې په دې تړاو فکر وکړو. زموږ اداره په ناروې کې مېشته ده او په افغانستان کې د بېځایه شویو خلکو شمېر د ناروې تر ټول نفوسه ډېر دی.»
د ناروې د کډوالو شورا له ۲۳ کلونو راهیسې په افغانستان کې فعالیت کوي او دې ادارې تېر کال په هېواد کې څه باندې ۲۵۰ زره کسانو ته مرستې برابرې کړې دي.
