د مارشال محمد قسیم فهیم په دفاعي پوهنتون کې د «مارشال فهیم» له څلي پرانسته وشوه
د افغانستان د اسلامي جمهوریت اجرائيه رئيس نن سهار د مارشال محمدقسیم فهیم په ملي دفاعي پوهنتون کې د مارشال محمد قسیم فهیم په یاد د جوړ شوي څلي پرانسته وکړه.
په دې اړه په جوړو شویو مراسمو کې د مارشال فهیم د ملي دفاعي پوهنتون رئيس تورن جنرال جلندر شاه وویل، چې یاد څلی د ملي دفاع وزارت په منظورۍ د مارشال فهیم بنسټ له لوري رغول شوی، چې ملي اردو ته د صداقت، شجاعت او یووالي سمبول وي.
همدارنګه د ملي اردو ستر درستیز سترجنرال محمد شریف یفتلي وویل، چې د مارشال محمد قسیم فهیم تحصیلي کمپلکس په کې د پلي شویو معیارونو له مخې په سیمه کې ساری نه لري.
هغه وویل، چې له دې کمپلکس څخه افسران په مسلکي او پوځي کجه ښه روزل کېږي او د ملي تفکر له مخې د یووالي، پیوستون او وروګلوۍ پر بنسټ زده کړې ورکول کېږي.
د هېواد اجرائيه رئيس ډاکټر عبدالله عبدالله په دې اړه مراسمو ته وویل، چې یاد دفاعي پوهنتون او نوی جوړ شوی څلی د یوه داسې ستر انسان په نوم نومول شوی، چې خپل ځان یې د جهاد او مقاومت له مهاله او بیا د ملي اردو په رامنځته کېدو سره افغان امنیتي ځواکونو ته وقف کړی و.
اجرائیه رئیس د یاد څلي له جوړېدو خوښي وښوده او له ټولو هغو کسانو څخه چې د دې څلي په جوړېدو کې یې اقدام او هڅې کړي مننه وکړه.
اجرائيه رئيس خوښي وښوده، چې د مارشال فهیم ملي دفاعي پوهنتون د ملي اردو لپاره اکاډميک کادرونه روزي او له شک پرته چې د هېواد او خلکو نه د دفاع په لاره کې د دې کادرونو دنده ارزښتمنه او اساسي ده.
اجرائيه رئیس امنیتي ځواکونو ته په خطاب کې وویل، چې تاسو د باطل پر وړاندې په جګړه کې د حق په لوري کې قرار لرئ، له خاورې او خلکو څخه دفاع په مېړانه ترسره کړئ، ځکه تاسو د مارشال فهیم په پوهنتون کې پوځي او مسلکي زده کړې کړي او دښمن مو توان نه لري.
