شیخ یوسف القرضاوي د نړۍ له مسلمانانو غوښتي چې د فلسطین قضیه خپله قضیه وګڼي، نه دا چې د فلسطینیانو د قضیې په شکل ورته وګوري.
د مسلمانو علماوو د ټولنې مشر پر مسلمانانو غږ کړی چې قدس یواځې د فلسطینیانو نه بلکې د ټولو مسلمانانو دی او له دې څخه دفاع هم پر ټول اسلامي امت لازمه ده.
قرضاوي په خپله ټوېټر پاڼه لېکلي چې موږ باید په ډاګه ووایو چې د قدس جګړه یوه اسلامي جګړه ده، ځکه قدس نه یواځې د فلسطینیانو یا د عربانو دی، بلکې قدس د ټولې اسلامي نړۍ ملکیت دی او په ټولو يې دفاع لازمه ده.
د یادونې وړ ده چې تېره اونۍ اسرائیلو د اقصی مسجد دروازې د امنیتي لاملونو په بهانه وتړلې او خلک يې د جمعې لمانځه ادا کولو ته پرې نه ښودل.
د یکشنبې په ورځ اسرائیلو په جزئي ډول د مسجد دروازې پرانېستې، خو پر خلکو يې شرط ولګاوه چې مسجد ته به یواځې د برېښنايي پلټنو دروازو له لارې داخلېږي. فلسطینیانو د اسرائيلو دغه وړانديز رد کړ او وايي چې اسرائیل غواړي له دغې لارې په اقصی باندې خپل حاکمیت راولي.
پرون د جمعې په ورځ یو ځل بیا فلسطینیانو د مسجد اقصی د پوره خلاصون له پاره ستر لاریونونه وکړل، چې د اسرائیلو له خوا پرې ډزې وشوې، چې له امله يې درې فلسطینیان شهيدان او نږدې سل نور يې ټپیان شول.
د یادونې وړ ده چې د مسلمانانو درېيم حرم «اقصی» په ۱۹۶۷ز کې د اسرائیلو اشغال کړی او تر اوسه د دوی تر اشغال لاندی دی.
