د عامې روغتیا وزارت: په دوو میاشتو کې د کانګو ناروغۍ ۳۸ سلنه زیاته شوي دي
دید خبرې آژانس: د طا-لبان د عامې روغتیا وزارت د روان زیږدیز کال په وروستیو دوو میاشتو کې د لومړۍ میاشتې پرتله د کانګو ناروغۍ له ۳۸ سلنې زیاتوالي څخه خبر ورکړی دی.
د عامې روغتیا وزارت ویاند شرافت زمان امرخېل وایي چې د روان زیږدیز کال په پنځو میاشتو کې، په ټول هېواد کې څه باندې ۲۰۰ تنه اخته شوي او شپږ تنه د دغې ناروغۍ له امله مړه شوي دي.
د عامې روغتیا وزارت ویاند په دې هکله وايي:«په تېرو پنځو میاشتو کې موږ په ټول هېواد کې ۲۰۳ په شاوخوا کې د کانګو ناروغانو مثبت واقعیات لرو، البته په تېر کال کې له موږ سره ۱۲۴۴ په شاوخوا کې د کانګو مثبت واقعیات وو، چې په هغه کې د ۱۰۰ په شاوخوا کې مړینه مو لرله. په دې وروستیو کې له موږ سره چې، په ټول هېواد کې په دغو پنځو میاشتو کې د مړینو واقعیات دي ۶ مثبت واقعیات لرو.»
د کابل د انتاني روغتون یو شمېر ډاکټران وایي چې په روانه لمریزه میاشت کې د کانګو ناروغۍ پېښې زیاتې شوې دي. دوی زیاتوي چې، د پنځلسو کسانو له ډلې چې د کانګو ناروغۍ د معاینې لپاره دغه روغتون ته ورغلي، د اتو تنو د معایناتو پایله مثبته وه.
ډاکټر فرید الله عمري وویل:«په دغې میاشتې کې د کانګو پېښې زیاتې شوې دي او هغه ناروغان چې د کانګو له امله بستر دي کابو ۸ مثبتې پېښې دي.»
د عامې روغتیا وزارت د شمېرو له مخې تېر کال په هېواد کې ۲۴۴ تنه پر دې ناروغۍ اخته شوي او ۱۰۰ تنه له دې ناروغۍ مړه شوي دي.
