د طا-لبانو مشرتابه امیر خان متقي تهران ته له سفره ګرځولی دی
دید خبرې آژانس: ویل کیږې چې د طا-لبانو مشر د دغې ډلې د بهرنیو چارو وزیر امیرخان متقي د ایران د ولسمشر د لوړې په مراسمو کې له ګډون څخه راګرځولی دی.
دا دویم ځل دی، چې ملا هبت الله متقي ته اجازه نه ورکوي، چې په بهرنۍ غونډه کې ګډون وکړي.
د طا-لبانو د رییس الوزرا مرستیال مولوي عبدالکبیر د سه شنبې په ورځ په دغو مراسمو کې ګډون وکړ.
تر دې مخکې باوري سرچینې ویلې و چې د طا-لبانو د مشر او د دوی د بهرنیو چارو وزیر ترمنځ اړیکې ترینګلې شوې دي. دا د دې لامل شو چې د طا-لبانو اصلي ویاند ذبیح الله مجاهد د امیرخان متقي پر ځای د دوحې په درېیمه غونډه کې د ګډون لپاره قطر ته ولاړ شي.
که څه هم دا څرګنده نه ده چې د طا-لبانو د مشرتابه او متقي ترمنځ اړیکې ولې ترینګلې شوې، خو د بروکینګز انسټیټیوټ تر دې مخکې راپور ورکړی و چې د طا-لبانو د مشرانو ترمنځ د دغې ډلې د تګلارو پر سر ژور اختلافات روان دي.
د دې ترڅنګ، په پاکستان کې د مذهبي چارو د څېړنو نړیوالې شورا د غبرګولي په میاشت کې په یوه راپور کې تایید کړه چې د طا-لبانو تر منځ نظریاتي، قومي، سیمه ییز او تنظیمي اختلافات تر بل هر وخت ډیر شوي دي.
