د طا-لبانو رییس الوزراء سیاسي مرستیال اوتونبایوا سره وکتله
دید خبرې آژانس: په افغانستان کې د طا-لبانو سرپرست حکومت د رییس الوزرا سیاسي مرستیال د یوناما له مشرې سره په کتنه کې د دوحې د درېیمې غونډې په لاسته راوړنو او له نړۍوالې ټولنې سره د اسلامي امارت د اړیکو په اړه خبرې کړې دي.
ارګ په یوه خبرپاڼه کې د روزا اوتونبایوا له قوله لیکلي، د اسلامي امارت او نړۍوالې ټولنې ترمنځ په لوړه کچه خبرې اترې د رغنده اړیکو د رامنځته کېدو لامل کېدای شي. د هغې په وینا له اسلامي امارت سره اړیکې د لویدیځو ټولنو هیله ده.
په خبرپاڼه کې راغلي چې مېرمن اوتونبایوا ویلي، په افغانستان کې د ملګرو ملتونو استازولي (یوناما) هڅه کوي چې د افغانستان په ټولو ولایتونو کې کوچنیو پورونو ته د لاسرسي زمینه برابره کړي.
په دغه کتنه کې د یوناما مشر همداراز زیاته کړه چې د دوحې د غونډې د پرېکړو پر بنسټ د افغانستان له خصوصي او بانکي سکټورونو د ملاتړ او له نشه يي توکو سره د مبارزې په اړه د دوو کميټو پر جوړولو کار روان دی.
په افغانستان کې د ملګرو ملتونو د سرمنشي استازې يادونه وکړه، چې ځينو هېوادونو لېوالتيا ښودلې ده، چې د هغو کميټو په اداره کولو، چې جوړېږي، د افغانستان له خصوصي او بانکي سکټورونو ملاتړ وکړي او له نشه يي توکو سره مبارزه وکړي.
ورته مهال مولوي عبدالکبیر له افغانانو سره د یوناما او د دې ادارې د مرستو قدرداني وکړه او ویې ویل چې د دوحې په درېیمه غونډه کې د ملګرو ملتونو له خوا د اسلامي امارت د شرطونو منل یو مهم ګام و او په دغه غونډه کې د ستونزو په اړه پرېکړې ارزښتمنې دي.
د رییس الوزرا سیاسي مرستیال ویلي، اسلامي امارت رغنده او مثبتو اړیکو ته لومړیتوب ورکوي، ځکه په وینا یې کابل غواړي له نړۍ سره ښه تعامل ولري.
