د طا-لبانو د عدلیې وزارت: د هېواد په کچه ټول ښارګوټي ارزول کیږي
د طالبانو د عدليې وزارت وایي چې د هیواد په کچه ټول ښارګوتي د دغه وزارت د غصب شویو ځمکو د استرداد کمیسیون لخوا ارزول کیږي.
عدلیه وزارت وايي، په هېواد کې د هستوګنې ټول ښارګوټي د ځمکو له غصبه د مخنیوي او بېرته راګرځونې کمېسیون له لوري تر ارزونو لاندې دي.
د دغه وزارت ویاند وايي، له ښارګوټو سربېره د هېواد په نورو برخو کې هم د ځمکو د ارزونې بهیر په جدي ډول روان دی.
برکت الله رسولي زیاتوي، چې دغه کمېسیون تراوسه د کابل ښار د یو شمېر سیمو او ښارګوټو ځمکې ارزولې دي.
د عدليې وزارت ویاند، برکت الله رسولي و ویل: د ځمکو د غصب د مخنیوي او د غصب شویو ځمکو د استرداد کمېسیون په ولایتونو او ولسوالیو کې د ښارګوټو د غصب د ارزونې په حال کې دي او که کومې ځمکې غصب شوې وي او هغه امارتي وي نو مستردې به شي.
د ښاغلي رسولي په خبره، د ځمکو د غصب د مخنیوي او د غصب شویو ځمکو د استرداد کمېسیون له جوړېدو او فعالیت راهیسې، تر دمګړۍ په کابل ښار او ولسوالیو کې نږدې ۶۰ زره جریبه ځمکه له غاصبینو بېرته راګرځولې ده.
د عدليې وزارت د اطلاعاتو پر بنسټ، د ځمکو د غصب د مخنیوي او د غصب شویو ځمکو د استرداد کمېسیون په ټول هېواد کې څه باندې دو نیم میلیونه جریبه غصب شوې ځمکې له غاصبینو بېرته نیولي او اړوندو اداروته يې سپارلي دي.
