ډيډ خبري اژانس: ايران او روسيه د هراړخيز ستراتيژيک تړون لاسليک کوي.
د افغانستان په چارو کې د روسیې ځانګړی استازی ضمیر کابلوف وايي، له ایران سره د هراړخیزو ستراتیژیکو همکاریو تړون د نهايي کېدو په حال کې دی او ډېر ژر به لاسلیک شي.
ده وويل: د سند د متن پر مسودې کار بشپړ شوى او هر څومره ژر چې بشپړ شي، د دواړو هېوادونو ولسمشران به پرېکړه وکړي چې دا سند کله او چېرته لاسليک شي.
د هغه په وينا، دا پېښه به ډېر ژر ترسره شي؛ ځکه چې سند په وروستي پړاو کې دی.
که څه هم د ده په وینا دا لا وختي ده چې په دقیق ډول ووایو چې تړون به کله لاسلیک شي، خو نږدې ده چې تر لاسلیک مخکې مقدماتي غونډو ته اړتیا نه وي.
د روسیې د بهرنیو چارو د وزارت ویاندې ماریا زاخارووا مخکې ویلي وو، تمه ده چې د روسیې او ایران ترمنځ نوی تړون د دواړو هېوادونو د مشرانو په راتلونکې غونډه کې لاسلیک شي.
هغه څرګنده کړه چې دغه سند به د روسیې او ایران د اړیکو ټوله برخه تر پوښښ لاندې راولي.
